Turkey President-in sorkar beitute tihhlum vek tiam

Turkey President Reccep Tayyip Erdogan chuan a kaihhruai sorkar paithlak tuma beitute chu tihhlum vek an nih tur thu a sawi. He thu hi kalta Inrinni  a, nikum July 15-a sipai chakna hmanga sorkar paithlak tuma beihna thleng champha puala Istanbul-a inpumkhatna kawngzawh, national unity march a hmanpuina-ah a sawi a ni. 

President chuan kum khat liamtaah khan tenawm taka chetna a thleng a ni a ti a, mahse sorkar beitute lakah hnehna an chan thu a sawi. Kum khat kalta chhung khan an ram chhungah pawikhawihna hrang hrang a thleng fo tih a sawi a, ram phatsantute chu an lu tansak vek an ni ang, a ti. 

Sipai ṭhenkhatte kaihhruaia sorkar paihthlak tuma beihna thleng avang hian mi 250 chuangin nunna an chan a, mahse sorkar beitute hi an tlawm a ni. Natonal unity march hi Bosphorus Bridge tia koh ṭhin, mahse nikuma mi 250 thihna thleng vanga Martyr Bridge tia thlak tak hmunah neih a ni. He lei bulah hian sorkar beitu sipai leh civil mite inbeihna thleng vangin mi 35 an thi a, mi dang 2,000 chuangin hliam an tuar a ni. Sorkar paihthlak tuma beitu zinga mi 35 chu kahhlum an ni bawk. 

Kawngzawhna hmunah hian martar 250-te thlalak leh an hmingte chu tarlan a ni a, President Erdogan chuan hmanrua nei loa huaisen taka sorkar beitute an beih let avangin a fak tih a sawi. Kum khat liamtaah khan sipai ṭhenkhat hian tank, indo thlawhtheihna leh helicopter hmangian President leh a kaihhruai sorkar hi paihthlak tumin an bei a ni. Sorkar beitute hian an ram parliament leh hmun pawimawh dang pawh an bomb tel a, hetih lai hian President Erdogan hi chawlh hmangin Aegean resort-ah a awm a ni. 

Sorkar beihnaa inhnamhnawiha puh sorkar hnathawk 7,400 chu ban a ni tawh a, sorkar beihnaa a bultumtu brea puh, US-a inkhuar Fethullah Gulen nena inzawmna neia puh mi 50,000 chuang man an ni tawh bawk. 



Share this Post

Login to comment
No Comments