Liu Xiaobo hriatrengna kawngzawh huaihawt

Chinese human rights activist thi ta, Liu Xiaobo-a hriatrengna kawngzawh chu kar kalta Inrinni khan Hong Kong-ah huaihawt a ni a, tel an ṭhahnem hle. 

Mipuite hian bati leh pangparte kengin Hong Kong khawpui laili laia kawtthler an zawh a ni. Liu Xiaobo hi kar kalta Ningani khan thin cancer natnaavangin a thi a, a ruang hi Inrinni khan tuipuiah phum a ni. Hong Kong-a kawngzawhte hian liason office pawna Liu hriatrengna an siamah kunin zahna an hlan. 

Kum 61 mi, Liu Xiaobo hi China sorkar policy sawisel a, democracy a thlawp avangin man a ni a, kum 2009 kha kum 11 tang tura hrem a ni. Kumin May thla khan thin cancer a vei tih hriatchhuah a ni a, hemi hnu hian enkawl turin jail aṭanga chhuahtir a ni a, mahse China sorkar chuan ram pawn lama inenkawl tura a chhuah a phalsak lo a ni. 

Liu-a nupui, Liu Xxia pawh house arrest-a hren mek a ni a, a pasal tan lai pawh hian thla khatah vawi khat chiah a tlawh phalsak a ni ṭhin. Liu-a thih hnuah Xia hi chhuah zalen turin Australia chuan China sorkar a ngen. Mahse China chuan Liu-a nupui hi a zalen niin a sawi a, a dikna chanvo neih pawh humhalh sak a nih tur thu a sawi.



Share this Post

Login to comment
No Comments