British special force-in IS hotu thah tumin veh dawn

British Special Air Service (SAS) chuan Islamic State (IS) hotu lu ber, Abu Bakr al-Baghdadi chu a nung chunga man kher tum loin, thah tuma an beih tur thu an puang.  

MI6 leh GCHQ-a Britain spy hotute chuan al-Baghdadi awmna chin zawngchhuak a, thah ngei tuma theihtawp an chhuah mek thu, Daily Star chuan a tarlang. An hmalakna hi SAS sniper-te'n an ho dawn a, squad-te'n Iraq leh Syria rama a biruk theihna hmun awmte an thlithlai reng bawk ang. 

Defence lam hotu pakhat chuan IS hotu chu an target pui ber a nih thu a sawi a, SAS chuan a awmna chin chhui chhuah ngei tumin an thiam thil leh tawnhriat neih zawng zawngte an hmang dawn a ni, a ti. IS hotupa chu khawmual sipai-te kutah emaw, drone leh thlawhtheihna hmanga beihnaah emaw a la thi thuai dawn niin a sawi bawk. 

IS hotu an vehna kawngah hian SAS chuan US-a Delta Force bakah, CIA leh National Security Agency-te an thawhpui dawn a ni. 

Kum 2006 khan SAS leh Delta Force-te hian Iraq rama Al-Qaida hotu Al Zarqawi chu an lo that tawh a ni. Tun hnaiah al-Baghdadi a thi tawh nia report awm mah se, thla hmasa lawk khan nungdama hmuh a nih thu sawi a ni. US sorkar chuan al-Baghdadi-a luman hi US dollar makatduai 10 aṭangin maktaduai 25-ah a lo tisang tawh bawk.


Share this Post

Login to comment
No Comments