Assam-ah lirthei an la táng zel

Nimin lam khan Lailapur, Assam aṭangin Mizoramah lirthei lut a awm lo a; hemi chungchangah hian state pahnih thuneituteah inpuh tawnna a awm nia thu dawn a ni.

Tarlan tawh angin, Silchar Mizoram House-a Mizo lirthei tángte chu Thawhṭanni chhun dar 12:30 vel khan Assam police vènna hnuaiah Mizoram hruai thlen an ni.

Lirthei dangte erawh chu chhuahtir an ni lo. Thawhṭanni chhûna Mizoram House aṭanga lirthei hruai chhuahte chu - oil tanker 11, gas phur truck 11, Pik-up truck pahnih leh private car pathum a ni.

Silchar Mizoram House-a tangkhangte ni lo, kawng laka lirthei tang dangte Thawhṭanni chhûn lama chhuahtir an nih loh hnuah, zanah lirthei eng emaw zat chu Mizoram panin an chhuak a; IPR department pawhin zan dar 10 hnuah Twitter-ah, "Mizo driver leh handyman tangkhangte bakah, bungraw phur lirthei dangte pawh Mizoram an lo lut chho ṭan mek a, lut hmasa berte hian Vairengte police checkgate an thleng tawh a ni," tiin an tarlang.

Thawhṭanni zana lirthei eng emaw zat Mizorama an luh hnuah, nimin lamah chuan lirthei lut a awm meuh lo a, Lailapur-ah an dang leh nia thu dawn a ni.

Kolasib DC Dr H Lalthlangliana chuan zawhna chhangin, Assam lam hian Mizorama lirthei an dang lo a, driver-te an tlân ngam lo niin an sawi tih sawiin, "Keini'n driver-te'n an hlau lo, tiin kan ṭang ve thung. Kan zu endik dawn hian a endiktu turte SSB (Assam lama duty)-te'n luh thlak an phal bawk si lo a, driver hoin an hlauh vang alawm, an ti tlat si a. Keini'n driver hoin an hlau lo, kan ti ve thung," a ti a; an mutàn ber hriat thiam a har thu a sawi.