Championship fixture a chhuak ta

Premier League hnuaia English football inelna Championship pawhin fixture an ti chhuak ve leh ta a, June 20 zanah Fulham chuan Brentford hmachhawnin league match hmasa ber khelh a ni ang.

Fulham leh Brentford hi season thara Premier League khelh la beisei ve ve an ni a, Championship lam pawhin inkhel boruak sang tak nen season an chhunzawm leh dawn tihna a ni. 

Championship hi March 8 hnu khan Covid-19 vangin khelh a ni tawh lo a, hemi nia Derby County-in 3-0 a Blackburn Rovers an hneh khan Championship match khelh hnuhnung ber a ni. 

Mahse, Premier League khelh chhunzawm dan tur ruahman ṭan a ni a, promotion & relegation kalpui tho tur a nih avangin Championship lam pawh hian May 25 aṭang khan club-te chu training neih an phal leh tawh a ni.