Tarun Gogoi vui liam a ni ta

Assam chief minister hlui leh Congress hruaitu Tarun Gogoi chu nimin khan state chawimawina famkim nen Guwahati-a Navagraha cremato­rium-ah vui liam a ni ta. 

Chief Minister term thum lo ni tawh, Gogoi vuina inkhawmah hian chief minister Sarbananda Sonowal, finance minister Hi­manta Biswa Sarma leh cabinet minister dangte pawh an tel. 

Navagraha crematorium chhungah hian mi 1,000 ṭhut theihna tur dah a ni a, pawn lam aṭangin mipuiten CM hlui thlahna hun hi an lo hman ve theihna turin LED platform-te siam a ni bawk. 

Vuina hun hman a nih hma­in Gogoi ruang hi a hmaa an lo ngenna angin Sikth Mile-a Kristian biak-in, Zoo Road-a Naam Ghar, Ambari-a Buraj Masjid, Brahmaputra lui kama Surkeshwar temple leh Latasil area-a Ugratara temple-a kalpui phawt a ni. 

CM hlui vui ni hi Assam sorkar chuan half holiday-ah a puang a, vuina inkhawm hman a nih chhung hian state sorkar office, semi goverment office, public sector under-taking, coroporation, board leh education institution-te chu khar vek an ni. 

Congress party hruaitu Rahul Gandhi chuan Tarun Gogoi thlah turin Nilaini khan Guwahati-a tlawh a, a ruang dahna Srimanta San­karadeve Kalakshetra-ah kalin zahna a hlan. Gandhi hian Gogoi-a chhungte, a nupui leh a fapa, Assam Lok Sabha MP Gaurav Gogoi-te chu an chenna inah a tlawh nghal bawk. 

Gandhi chuan Tarun Gogoi chu a guru, a zirtirtu a ni tih sawiin, Assam chungchang pawh amah anga hrilhfiah theih tumah an awm lo tih sawiin, Gogoi chuan fapa ang maia a en thu a sawi bawk. Tarun Gogoi leh Congress hruaitu hlun dang, Ahmed Patel an chan chu pawi a ti tak zet tih sawiin, an party tan a lungchhiatthlak hle tiin Gandhi chuan a sawi. 

Assam chief  minister ni rei thei ber, Tarun Gogoi hi hun rei tak a dam loh hnuin November 23 khan a thi a, state pumah ni thum chhung sun a ni a, nimin khan Guwahati-ah vui a ni ta a ni. 

Vui a nih hma hian a ruang hi state secretariat Janata Bhahwan, state Congress headquarters Rajiv Bhawan-ah te lak a ni a, Nilaini khan mipuite an thlah theihna turin Srimanta Sankardev Kalakshetra-ah dah a ni a, heta aṭang hian vui turin phurh chhuah a ni.