Trade union-in ram pum huap nawrh huaihawt

Sorkar laipuiin farm law thar a siam leh labour law thar a siam duh lohna avangin central trade union chuan nimin khan ram pum huap, Bharat bandh an huaihawt.

He bandh huaihawt vang hian West Bengal leh Kerala-a transport service ṭhenkhat chu a khaihhlak phah hle. West Bengal-a rel kawng ṭhenkhatte chu trade union-te chuan an dang a, Kerala-ah hian bus tam tak a service thei lo a, bazar pui ṭhenkhatte chu khar a ni bawk. Delhi-ah pawh nawrh huaihawt dawn vang hian a hmain Gugugram leh Faridabad border-te khar a ni a, metro service pawh a nghawng buai a ni. 

Trade union member-te chu Delhi-a Jantar Man­tar-ah nimin tlai khan an pungkhawm bawk. He Bharat bandh-ah hian ram pum huapin hnathawktu vaibelchhe 25 velin an tel tih trade union hruaitute chuan an sawi. 

Delhi-a nawrh huaihawt­naa tel tura Uttar Pradesh, Haryana, Uttarakhand, Rajasthan, Kerala leh Punjab aṭanga tractor  hmang leh ke kalte chu Haryana-ah police tam tham takin an lo dang.  Haryana leh Punjab ramri bulah darkar hnih vel an innawr buai bawk a ni. 

 Central trade union intel khawmah hian ramchhunga trade union 10 an tel a, heng zingah hian Indian National Trade Union Congress (INTUC), All India Trade Union Congress (AITUC), All India United Trade Union Centre (AIUTUC), Trade Union Co-ordination Centre (TUCC), Self-Employed Women's Association (SEWA), All India Central Council of Trade Unions (AICCTU) leh a dangte an tel a ni.

RSS nena inzawmna nei trade union organization, Bha­ratiya Mazdoor Sangh (BMS) chu Bharat bandh-ah hian an tel ve duh lo thung.