Manipur CM hoin Covid-19 chungchanga meeting nei

Manipur chief minister N Biren Singh hoin Nilaini khan an state-a Covid-19 leng mek leh a kaihhnawh chungchangte ngaihtuahin meeting neih a ni. 

Cheif Minister Secretariat-in meeting zawha thuchhuah a siamah, Covid-19 vanga thi te leh, hospital leh Covid care centre-a hri kai enkawl mekte dinhmun enfiah turin committee din a ni dawn tih sawi. 

Covid-19 kai enkawl mek, natna benvawn nei telte chu antiviral drugs pek an ni dawn a, Covid committee hrang hrang hnenah symtom nei, hri kaite rang zawka hriatchhuah an nih theihna tura an oxygen level check sakna tur oximeter sem vek an ni bawk ang. Hri kai enkawlna, basic treatment chu Chief Miniter Gi Hakshelgi Tengbang (CMHT) hnuaia pek a ni dawn tih thuchhuah chuan a tarlang bawk. 

CMHT hi state health scheme, kum 2018, January thla aṭanga hman a ni. Chhungkaw pakhatah natna na zual chi sarih enkawlna atan cheng nuai hnih thleng pek theih a ni. 

Meeting-ah  hian state chhunga hripui vanga thi an pun chhoh dan te, hospital leh care centre-a hri kaite awmna tur khum dah belh chungchangte leh hri kaite enkawl an nih dante sawiho a ni bawk. 

Manipur-ah hian Nilaini khan Covid-19 vangin mi pathum an thih belh leh a, hripui vanga thi hi mi 187 an tling tawh a ni. Hri kai hmuh chhuah thar mi 262 awm leh bawkin, Covid-19 kai hmuh tawh hi mi 19,503 an tling tawh a, an zinga 15,618 chu enkawl dam an ni tawh a, recovery rate hi 80.07% a ni.