Driver tangkhangte ngaihtuah a hun

Assam-in Mizoram ramri an chuhpui avanga tun hnaia buaina chhuakah Assam lamin Mizoram lo lut tur lirtheite an la dan avangin Mizo driver eng emaw zat chu Silchar leh a chehhvelah an la tangkhang a; Silchar lam mi leh sate'n ṭanpuina an pek avangin Mizoram chief minister chuan Twitter kal tlangin lawmthu a sawi. 

Mizoram lamah pawh Assam lirthei tangkhang eng emaw zat a awm a, inbiakna neih a nih hnuah ṭha taka chhuah an ni. Hetihlai hian Lailapur bawr velah lirthei hi an dan tlat avangin Mizoram pan tur lirtheite an lo chho ve thei lo. 

Mizoram lirthei dangtute hian an tum ber nia lang chu Mizoram mipuite harsatna siam a, hrek rilṭam a, mangang taka Mizo mipuite siam a ni. Heng mite hi a mimala zuk hriat theih ni lo mah se, Assam lam mite tiin a khaikhawm theih a; hetiang boruaka kan awm meklaia kan ram hruaitu lu berin Assam lam mite hnena lawmthu a lo zuk sawite hi thil ṭha tak ni si, sawi hun lo taka sawi chhuah ni berin a lang. 

Kan driver-te hi hruai chhuak phawt se, him dam takin Mizoram lo lut se, chumi hnuah chuan sorkar pui pui ni lo pawl hrang hrangte pawhin lawmthu sawi se thil inhmeh tak a nih hmel. Chutihlaia state hotupa berin kan lirthei dangtu Assam lam an nihlaia Assam mite hnena lawmthu sawina ṭawngkam a lo nei hman hi a hmanhmawh lutuk hret niin a lang a; Mizo driver tangkhangte leh an lirtheite him taka Mizoram an lo luh hmaa Assam lam tlawn niawm taka puh theiha kan chief minister a ṭawng chhuak hi a hmanhmawh lu hret niin a lang. 

Chief minister lawmthu sawina ṭawngkamah hian sorkar laipuia Ministry of Home Affairs (MHA) lam puihna zara remna a awm theih a beisei thu a tel a, hei hian kan ramri buaina chinfel kawngah sorkar laipui lam kan au niin a ngaih theih bawk. Engpawhnise kan duh ber ramri chinfel hi la thleng phak lo mah ila ramria buaina chinfel phawt hi thil ṭha leh ṭul a ni. 

MHA zarah kan driver-te pawh him takin Mizoram an lo lut thei turah beisei ila; Mizo driver tangkhangte hi him takin an awmna hmunah an awm a nih pawhin kan ngaihsak a hun a, hruai kir dan ngaihtuah a hun tawh e. Thilpek lo petute chunga lawmthu sawi hi a ṭhat rualin Mizorama hruai kir an nih hnuah ni thei hram se.