El Clasico: Real hmaah Barca an mualpho

Pathianni zan El Clasico inkhelah Barcelona an tlawm a, Real Madrid chu Spanish La Liga hmahruaitu an ni leh ta - team pahnih inkarah point khat a awm. 

Santiago Bernabeu-a inkhelah Real Madrid hian 2-0 in hnehna an chang a, mualneitu team tan Vinicius Junior leh Mariano Diaz ten goal khat ve ve an khung a, an hmelma kumhlun an nuih. Real Madrid legend Cristiano Ronaldo chuan inkhel hi a hmunah a en a, a club hlui tana Vinicius-a goal khung chu uar takin a ṭhutna lamah a lo lawm. 

Barca thiampuipa Lionel Messi-a'n kar hmasa lawk khan European champion ni tura an ṭhat tawk loh thu a sawi a, tuna zawhna ni ta chu, "Spanish champion ni tur pawhin an ṭha tawk em?" tih hi a ni.

El Clasico an khelh hmaa an league match hnuhnung pahnihah Real Madrid-in point khat chauh an hlawh chhuak a, Champions League-ah Manchester City chu 2-1 in an ngam lo bawk. 

Real boss Zinedine Zidane-a'n an dinhmun a hrechiang a, inkhel boruak sang tak hmachhawn dawn mah se huaisen takin a ṭawng lawk ngam lo. French manager hian an dinhmun a chhiat thu a sawi a, first half-a Real player-te khelh danin an pu thusawi a nem nghet - Barca chu team hmuhnawm leh hlauhawm zawk an ni. 

Mikhual team tan hian Antoine Griezmann, Arthur leh Lionel Messi te chuan chance hlauhawm an nei vek a, mahse an hun ṭha neih an chhawr thei lo. 

Real tan first half-a player langsar ber chu Thibaut Courtois a ni a, Belgian goalkeeper hi Real goal ban inkarah a rim hle - first half-a Madrid him chhan a ni.

Kum 27 mi goalkeeper hian chawlhlawk hman a nih hmaa save a neihte nena chhiar telin Real tana league-a shot a hmachhawn hnuhnung 36-ah vawi 30 a dang. League-a El Clasico an khelh hnuhnung pasarihah Real an chak zo lo a, first half-a an khelh dan en chuan thawnthu a danglam tam dawn lo niin a lang hman. 

Mahse, Zidane-a'n chawlhlawkah a naute thu a fah ṭha tih a lang zui a, second half-ah Real an hlauhawm sawt. Isco-a chance duhawm chu Barca keeper Marc-Andre ter Stegen faknaah a chang thung. 

Real-in chance an neih chhunzawm a, Karim Benzema chuan vengtu nei lo chungin goal a khung thei lo. Barca tan forward thar Martin Braithwaite-a lang ve zawk a, a chance ṭha neih erawh a chhawr thei bik lo. 

Mahse, minute 71-naah Vinicius a rawn lang a, Brazilian rawlthar duhawm hian Santiago Bernabeu lamtirin goal a rawn khung. Vinicius hi kum 2001 hnua league game-a El Clasico-a goal khung thei naupang ber a ni - kum 19 leh ni 233 a ni a, Messi record a rawn khum. 

Argentine forward hian kum 2007 khan he record hi a lo chelh tawh a, a hunlai hian kum 19 leh ni 259 mi a ni. Vinicius aia a ropuina chu Messi hian hattrick nen a record hi a siam. 

Real hi 1-0 in an chak mai dawn niin a lang hman - mahse hun pek belh minute hnihnaah Mariano chuan a la duhtawk ve lo tih a pholang a, an goal hnihna rawn khungin Barca beiseina a thamral. 

Mariano hi hun pek belh minute khatnaah luhtir a ni a, goal a khung nghal - El Clasico hma hian tun season-ah La Liga a la khel miah lo a, game pawimawhah luhtir a ni a, goal a khung! Kum 26 mi Mariano hi Real Madrid youth system chhuak a ni a, kum 2017 khan Bernabeu chhuahsanin Lyon a zawm. French club tan season khatah match 45 khelin goal 21 a khung a, 2018-19 season-ah match thum chiah a khel hman tihin Barca a pan. 

Mahse, Real-ah a beisei angin hmun a chang zui lo. Season hmasa khan match 19 chiah khelin goal li a khung a, tun season-ah minute tlemte chauh khel chungin goal a khung.