Syria Indona: Turkey drone-in Syria sipai 19 a that
UK-a hmunpui nei Syrian Observatory for Human Rights (SOHR) chuan Turkey-in drone hmangin Pathianni khan Syria sipai 19 Idlib-ah an that tih a tarlang.
Turkey hian Pathianni khan Syria jet fighter pahnih a kap thla bawk. Syria thlawptu Russia chuan thuchhuah siam nghalin, an ram van boruakah Turkey thlawhtheihnate an him ang tih an tiam thei lo tih an tarlang nghal a ni.
Kar hmasa khan Syria-a Idlib khawpuiah hian Syria leh Turkey inkar boruak hi a sosang hle a, Syria hian thlawhtheihna hmangin Turkey sipai 33 lai an that a, Turkey-in Syria sipai 19 an thah leh bawk si avang hian Russia hi nasa lehzuala a inrawlh hlauthawngtu an tam hle.
Syria hian Turkey drone pathum an kap thla tih an sawi bawk a, hetihlai hian Syria jet fighter an kahthlaka pilot-te erawh hi chu him takin parachute hmangin Idlib province-ah an ke an nghat thung. Idlin-a helte thlawptu Turkey lam hian thuchhuah an siamah Syrian air defence system leh tank-te an bitum tih an sawi a ni.
Turkey leh Russia thlawp Syria inkar boruak hi chhe hle mah se Turkey president Recep Tayyip Erdogan chuan kar leh hian Russia president Vladimir Putin chu inbiakna neihpui a tum. Syria sorkar hian Russia thlawpnain Jihadist group leh Turkey thlawp helte thunun Idlib chu laklet an tum a ni.