Afghanistan president-in jail tang inthleng rem ti lo

Afghanistan president Ashraf Ghani chuan an rama Taliban firfiakte nena jail tang inthleng chu rem a tih loh thu Kabul-a chanchinbu mite hmaah a sawi.

Kar kal ta Inrinni khan United States leh Taliban firfiak pawl chuan kum 18 chhung zet an inkara buaina awm tawh chu tihtawp a nih theih nan inremna an ziak a ni.  Inremna an ziahah hian, March 10-ah Taliban jail tang 5,000 leh Afghanistan security force jail tang 1,000 inthlengna neih fel tur tih a tel a, hei hi Ghani chuan Afghanistan sorkarin a pawm loh tih nimin khan a sawi a ni.

Ghani hian jail tang chhuah chungchangah US chu thutawp siam theitu an nih loh thu sawiin, indona vanga ramchhunga buaina tawh fona hmunah chuan thil tisualtu, jail tang chhuah an nih chuan boruak muanawm awm tur tichhiain, buaina thleng leh mai thei an nih thu a sawi bawk. 

Afghanistan-ah hian ni sarih chhung atan reduction in violence (RIV) chu kalpui mek a ni a, hei hi sorkar chuan ramchhunga buaina thleng ṭhin tih ziaawm a nih theih nana a tih a ni. RIV hman mek a nih avangin US leh Taliban inkara inremna ziahnaah pawh boruak muanawm tak a awm theih phah bawk. Ghani hian hemi chungchang pawh hi sawi telin, ramchhunga inkahhai puan fel vek a nih hma loh chu RIV hi hman zel a nih tur thu a sawi bawk a ni.

Afghanistan sorkar hian ramchhunga mipui 63.5% awmna chu a thunun a, mahse nikum khan hei hi 1.7%-in a tla hniam a ni. Taliban-te hian mipui 10.8% awmna chu a thunun thung a ni. Taliban-te hian a rambial ang zawng pawhin Afghanistan-ah hian awmhmun an khuar hnem hle. Hei vang hian Afghanistan sipaite beihna pawh a thleng fo bawk.

US leh Taliban-te hi Afgha­nistan-a indona tihtawp a nih theih dan kawng zawngin hun rei tak an lo inbe tawh a ni. Nikum September thla khan inremna ziah an tum a, mahse Afghanistan-a Taliban ten American sipaite an thah vangin 

ṭhulh leh a, kar liam ta Inrinni khan inremna hi an ziak thei ta a ni.