Djokovic-a'n Jaziri a hneh

Season bul ṭan fuh tak Novak Djokovic a khel ṭha chhunzawm zel, Serbian tlangval hian Dubai Championships lama a match hmasa berah wildcard hmanga inlan Malek Jaziri chu 6-1, 6-2 in a hneh.

Djokovic hi seeded pakhatna pek a ni a, vawi li a champion tawhna hmunah hian 2016 hnua a vawi khat nan a inlan leh chauh; a khingpui hi world number 260-na daih a nih avangin Novak hi kawng engkimah a chungnung zawk.

World number 1 hian hnehna chang turin darkar khat vel bawr bak a mamawh lo, vawi sarih aces vaw chhuakin service a nei ṭha leh tawh. A match lehpekah chuan Egyptian Mohamed Safwat 4-6, 6-4, 6-0 a hnehtu Philipp Kohlschreiber a hmachhawn leh ang.

Grand Slam vawi 17 champion tawh Djokovic chuan, "Dubai-ah hian 2016 hnuah ka inkhel ve leh chauh a ni a, match hmasa bera ṭha taka ka khel thei hi ka lawm hle. Ka khingpui leh tur Philipp inkhel ka en nawn ve leh a, a theihna a sangin a hautak dawn hle," a ti.

Inkhel dangah Karen Khachanov chuan Mikhail Kukushkin 7-6 (7/2), 6-1 a hnehin second round a inhlangkai ve bawk. World number 14 Andrey Rublev pawhin Italian tlangval Lorenzo Musetti chu 6-4, 6-4 in a hneh a, Richard Gasquet-a'n Lloyd Harris 7-6 (7/5), 6-4 in a hneh ve thung.