Khatla TBL leh Zarkawt BCA an lian

2nd March, 2020

Mizoram Super League season 6 khelh laiah Khatla TBL leh Zarkawt BCA ten champion an tum tih an lantir nghal a, team ṭha pahnih hian match hnih an khelh tawhah hnehna an chang ve ve. Match 4, Nilaini zanah TBL leh BCA te hi an inhmachhawn ang.

TBL an ṭha

Hawla Indoor Stadium, Republic Vengthlangah MSL season hmasa pahnih champion TBL hian Zirtawpni zan khan kumina an match hmasa ber an khel ve chauh a, inkhel inhnehtawk takah Chanmari Vikings chu 96-83 in an hneh.

Viking lakah Xavier Dupree a hmuhnawm, American player hian point 31 a neih bakah rebound vawi kua a la; block vawi ruk a neih hi a ṭangkai hle bawk. Dupree bakah Vanlalrinchhana (12 points), H. Laldinsanga (15) leh Eddie Zaithanmawia 15 ten an thawh hlawk bawk.

Team thar Chanmari Vikings lamin inelna neih hma lawka an chah luh Raymond Miller Jr. an chhawr nghal, American tlangval hian point 28 leh rebounds vawi 13 lain double double nei mah se a team chak pui nan a tawk zo lo, Zonunsanga chuan point 24 a nei bawk. Inrinni zanah TBL an inlan chhunzawm, Khatla team hian kai thar Chawnpui BC chu 88-82 in an hneh. Chawnpui lakah pawh American forward bawk a hmuhnawm, point 33 a neih bakah rebound vawi 20 zet lain a inkhel chu en tham a tling.

Champion zia BCA

Mizoram Super League champion lai Zarkawt BCA-in an match hmasa berah Ramhlun Sporting Club an hneh a, match hnihnaa Tuikual South an hmachhawn ṭum erawhin vanneihna an mamawh - Zarkawt team hian 87-85 in hnehna an chang hram.

MSL Most Valuable Player nilai Lalrina Remthlei a hmuhnawm chhunzawm, Tuikhuahtlang star hian point 15 a neih bakah rebounds vawi 10 la lehin a match zawnin double double a nei - team dang tana ven ngun ngai bik a la ni reng. Tuikual lakah Malik Price Prince a inlan a, ani pawhin double double nei turin (24 points, 11 rebounds) a la. An match dawt leha Khatla TBL nen an inhmachhawn tur hi tualchhung basketball ngaina tute tan hmaih phal chi a ni dawn lo.

Season hmasa finalist TKBC lamin a tir lamah beisei phak lo mah se hun tawp lamah an ṭang thei viau, captain F. Zodinthara (25 points), Lalnunpuia Renthlei (18), Dennis Lalmuanpuia (17) leh Lalfakzuala (11) te khel ṭha viau mah se an chak zo lo. March 6, Zirtawpni zanah Ramhlun nen an inkhel leh ang.