Entu nei loin Inter inkhel dawn

Inter Milan chuan Ningani zanlai hian Europa League last 32 second leg atan Ludogorets an mikhual dawn. Hri leng mek coronavirus vangin San Siro-ah fans an lut thei dawn lo a, stadium ruakah team pahnih an intawng dawn.

Italy ramah coronavirus kai mi 165 hmuh chhuah an ni tawh, hri leng vang hian Italy hmar lama Serie A match khelh tur pali chu a hun sawn a lo ni tawh - Thawhṭanni khan school leh college hrang hrang pawh khar a 

ngai hial.

Europe football thuneitu sang UEFA chuan club pahnih - Inter leh Ludogorets te bakah Italian sorkar thuneitu lam a bia, ngun taka ngaihtuah a nih hnuah inkhelh hun sawn ai chuan mipui tel loin player hlang chauha khel turin thu an ti tlu.

Antonio Conte naute hian Bulgaria ramah 2-0 in hnehna an lo va chang tawh tho a, tun ṭumah hian fans tel loin khel mah se harsa lutuk loa chak nawn tura ngaih an ni. Chutihrualin Inter buaina hi Europa League-ah chauh a ni lo, league lamah pawh harsatna thleng zui thei reng a la ni.

Pathianni zan hian Inter Milan-in Italian champion Juventus chu league match khel turin an lenchilh dawn. Italian football federation (FIGC) president Gabriele Gravina chuan, "League match hi a hmunah mipui en theih loh tura tih duhna a awm, hei hi Pathianni hma aṭang pawhin hman ṭan a ni mai thei," a ti.

Conte chuan, "Kei pawh hi infiamna ngaina tak ka ni, hetianga sports en theih loh kan siam hi a pawi ka ti takzet. Mahse, thil thleng mek hi kan ngaihthah chuan a ṭha lo zawk thlen belh thei reng a ni a, chuvangin match tam zawk pawh tih danglam a la ngaih a rinawm," tiin a lo sawi ve tawh bawk.

Coronavirus hi a darh ṭanna China-ah chuan mi 77,000 chuangin an vei tawh a, mi 2,600 vel an thi tawh. Europe ram zinga vei hnem ber Italy-ah hri kai mi 165 zet hmuh chhuah an nih tawh avangin an ram sorkar chuan a darh zel loh nan a theihtawpin hma a la.