Ruihhlo ngaite khuah khirh dan tur rel

Nimin khan Champhai SDO (Sadar) Lalnunfela Chawngthu hoin sorkar leh khawtlang hruaitute an ṭhukhawm a, Covid-19 darh tur ven kawnga hmalaknaah, lockdown kalpui chhunga ruihhlo ngaite enkawla khuahkhirh dan tur an rêl. Lalnunfela Chawngthu chuan, inkharkhip chhunga ruihhlo ngaite leh zuarte tun hnaia man an ni leh ṭhin chu veiawm a tih thu sawiin, "Natna pu darh theitu an nih avangin vènthàwn thilah chak lehzuala enkawla khuah khirh an ngai.

Ramri depa awm kan nih avangin fi mkhur lehzual a ngai," a ti. Meeting chuan, lockdown chhunga ruihhlo zuar leh ti ṭhinte chu village task force-te’n an huam chhung ṭheuhah khuahkhirh ṭhin se, an khuahkhirh theih bak chu thuneitute hnenah thlenin, a ṭul anga khung hrana khuahkhirh mai ni se, an ti.

Enkawlna senso leh mamawh dangte chhawmdawl kawngah a ṭul angin sorkarin hma la se, an ti bawk. Lockdown vangin tualchhungah ruihhlo hmuh a awlsam lo a, chuvang chuan ramri kâna Myanmar lama lak tum awm ṭhina sawi a ni. An chhinchhiah danin, Champhai khawpui chhungah hriau hmanga damdawia inchiu ṭhin mi 822 leh khaw dangah mi 106 awm anga chhût a ni a,  mi 100-120 vel hnenah lockdown chhunga tla tur OST damdawi pek a ni.