Super Over-ah New Zealand vanduai

Cricket-ah Super Over a thleng meuh lo a, Cricket World Cup-ah Super Over a awm a, New Zealand a vanduai zawkah an ṭang. Kiwis hian Super Over hmang bawkin January 29 khan India nen T20 series an khelh mekah an chak lo.

Virat Kohli hote hian 3-0 in series-ah hma an hruai a, vawiin chhun dar 12:30 hian Wellington Regional Stadium-ah match lina an khel ang. 

Seddon Park-ah New Zealand-in vawm hmasak an thlang a, Rohit Sharma-a'n run 65 siamin India-in run 179 an siam. New Zealand-in Kane Williamson-a hoin target an um a, chak thei dinhmuna an din hnuah Mohammed Shami-a'n India a chhanhim. 

Shami hian run 95 siamtu Williamson chu over 19.3-ah a vawm hlum a, New Zealand hian ball thumah run hnih an siam chauh a la ngai. Tim Seifert-a'n ball a hmachhawn pahnih vaw fuh lo ve ve mah se a hnuhnung zawkah tlan thoin ball khat a la awmin run khat an la mamawh. Shami-a'n ball tawpna berah Ross Taylor a vawm hlum a, Kiwis hian 179/6 tho an siam avangin Super Over an khelh a ṭul phah.

Super Over-ah Rohit Sharma rawn che ṭha lehin ball li lekah run 15 a siam a, KL Rahul-a run nga siam nen run 20 an siam. New Zealand tan target a sang mah mah a, Kane Williamson (11) leh Martin Guptill (5) ten run 17 siam mah se an chak zo lo.

New Zealand hian Super Over hrim hrim hi vawi sarih an hmachhawn tawh a, vawi khat chiah chakin vawi ruk dangah an chak lo.