Assam CM-in ram nei lote hnenah land patta a sem
Assam chief minister Sarbananda Sonowal chuan Thawhlehni khan an ram leilung fa, ram nei lo chhungkaw 4,513 te hnenah land patta leh land allotment letter a sem. Hemi rual hian tuilian tuarte hnenah
ṭanpuina sum a sem nghal bawk.
CM Sonowal chuan a kaihhruai sorkarin Assam leilung fate chawikanna tur leh hmasawnna turin theihtawp a chhuah zel tih sawiin, state mipuite tana ṭha lo zawngin hma a la ngai dawn lo tih a sawi a ni.
Sonowal chuan kum 70 chhung zet ram leilung fate land rights chu ngaihthah sak an ni tih sawiin, a kaihhruaina hnuaiah sorkar chuan kumin chhung ngeiin tualchhung mi, ram nei lote chhungkaw nuai khatte hnenah land patta a pe dawn tih a sawi. Nikum khan ram nei lo, chhungkaw 12,000 hnenah land patta pek an nih thu a sawi bawk.
Leilung fate humhalhna turin sorkar chuan theihtawp a chhuah zel a, Assamese leh tualchhung ṭawng dangte pawh vawnhim an ni zel dawn tih a sawi. State sorkarin mipuite dinhmun chawikanna tur leh, infrastructure lam tihhmasawnna tura a hmalakna hrang hrangte CM chuan a sawilang bawk a ni.
Sonowal chuan Assam-a BJP sorkar a din hnuah boruak pawh a muanawm chho hle nia sawiin, Bodo hnamte nena buaina chinfel a, inremna ziahpui a nih theihna tura prime minister Narendra Modi hmalakna pawh fakawm a tih thu a sawi. Thawhṭannia sorkar laipui, state sorkar leh Bodo organisation-ten inremna an ziah chuan Assam ram chin engmah a tihdanglam phah loh tur thu a sawi bawk.