Mamata-i'n inbiakna neih hmain CAA sut phawt turin PM a phut

West Bengal chief minister leh Trinamool Cong­ress (TMC) hotu, Mamata Banerjee chuan Citizenship Amendment Act (CAA) chung­changa prime minister Na­rendra Modi chu inbiakna neihpui a inpeih tih a sawi. Hemi rual hian inbiakna an neih hmain he dan sawisel hlawh tak hi sorkar laipui chuan a sut phawt tur a ni, a ti. 

Banerjee chuan sorkar laipui dan siam thar duh loh avang ngawtin eptu party-te chu ram dodal leh phatsantua puh an ni thei lo tih sawiin, an state-ah chuan CAA, NRC leh NPR te chu kalpui a ni ve dawn lo tih a sawi. 

"Prime minister-in sawiho a duh chu a ṭha hle. Mahse inbiak hmain CAA hi sut a ni phawt tur a ni. Sorkar laipui hian Kashmir leh CAA chungchanga thutlukna a siam hma hian all-party  meeting pawh a ko lo a ni," a ti.  West Bengal Assembly hian Thawhṭanni khan CAA duh lohna resolution a lo pass tawh a, nikum September 6 khan NRC duh lohna reso­lution a pass tawh bawk.