SC-in Singh-a zualkona hnawl sak

Nirbhaya pawngsual case avanga khaihlum tur zinga mi, Mukesh Singh-a'n 'mercy petition' a thehluh chu president Ram Nath Kovind-a'n a hnawl tak avangin, Supreme Court (SC)-ah a zualko zui a, nimin khan SC chuan Singh-a zualkona hi a hnawl sak ve leh. 

January 17 khan Pre­sident Kovind-a'n mercy petition thehluh a hnawlsak avangin, Singh hi SC-ah a president-in a hnawl tak hi a khing let a, mahse Justice R Banumathi hoa judge pathum ṭhukhawm chuan Singh a zualkona hi nimin khan a hnawl sak ta a ni. SC Judge pathum ṭhukhawm chuan president-in mercy peti­tion a hnawl hi jail-a tang mekin a khing thei lo tih an tarlang bawk. 

Nirbhaya pawngsual case avanga Delhi High Court-in thi tura a tihte hi Mukesh Kumar Singh, Pawan Kumar Gupta, Vinay Kumar Sharma leh Akshay Kumar Singh-te an ni a, ruahman lawk ang chuan February 1 zing dar 6-ah khaihlum tura tih an ni.

January 22 khan heng thil tisuala puh thiam loh chang palite hi khaihlum tura tih an ni a, mahse an zinga Mukesh Singh-a'n mercy petition a thehluh chu ngaihtuah fel a nih hma loh chuan court-in khaihlum rih lo turin Delhi sorkar chuan a ti a, hei vang hian an thih hun tura ruat hi sawn hlat a ni.