Champhai MJA-te'n Khawbung Block an tlawh

Information & Public Relations (IPR) department buatsaihin Champhai district Mizoram Journalist Association (MJA) member-te chuan tun hnai khan ni thum leh zan hnih thangin Khawbung RD Block-a sorkar hmun leh hmalaknate an enfiah.

Champhai MJA-te hian Khuangthing leh Ṭhekpui khaw inrìnaa Tlawva lui tui la pénga kawlphetha megawatt 5 siam thei tur Tlawva Small Hydel Project siam mek an tlawh. He hydel project-ah hian  khawl pahnih, megawatt 2.5 ve ve siam chhuak thei tur a awm a, sub-station tur bun a ni tawh.

Tlawva Small Hydel Project hi Nortech Power Private Limited, Kolkata-in an siam a, contract amount chu cheng nuai 5,670 niin, approved  estimated amount chu cheng nuai 7,340 a ni. NABARD aṭangin cheng nuai 5140.49, Ministry of New & Renewable Energy (MNRE) kaltlangin cheng nuai 700 leh state matching share aṭangin cheng nuai 1499.51 hmuh a ni a; May-October chhungin kawlphetha megawatt 5 leh tui tlem lai November-February inkarah megawatt 1 siam chhuak thei tura ngaih a ni.

He project hnuaiah hian Mizorama a vawi khatna turin ṭhál tui tlem laia kháwl lian a nun zawh loh lai pawha kawlphetha siam chhuak thei tur secondary unit pawh cheng nuai 412.30 sênga siam tum a ni. Sorkar laipuia Ministry of New & Renewable Energy-in pawmpui tawhin, tuna project kal lai mek hawn hnuah siam ve leh nghal tum a ni bawk.

Tlawva Small Hydel Project leh secondary unit ṭangkawp hian fûr tui tam laiin kawlphetha megawatt 5.5 a pe chhuak thei dawn a, secondary unit hian kum tin cheng nuai 61.77 a thawk chhuak thei tura chhût a ni.

Champhai MJA member-te chuan Dungtlang police outpost ni ṭhin, police station puitlinga hlàn kai thar pawh an tlawh a; Khawbung BDO pisa, Khuangthing YMA leh pipu sûlhnu hrang hrang an tlawh bawk.