END-in zu dap beihpui thlak

Excise & Narco­tics department (END) enforcement-te chuan February 22, Inrinni khan Phunchawng leh a chheh­velah zu dap beihpui an thlâk a, zu siamna hmun 16 tichhiain, rakzu litre 525, zu bilh lai ṭín 1,410 leh zu siamna hmanrua tam tham tak an man.

END hian chawlhkar liam ta chhung khan rakzu litre 1,180, zu bilh lai ṭín 787, zu siamna bél 19, sap zu ûm puitling 149 leh ûm chanve 23, beer can 8, zu siamna dawidim gram 135, BEDC (Myanmar zu) litre 128, heroin gram 312.75, ganja gram 505 leh Tramadol mûm 404 an man a; zu leh ruihhlo dang an man kaihhnawihah mi 77 an man bawk.

Excise & Narco­tics department hotute chuan, MLP Act hman a nih hnuah dan loa hmanhmawh leh fimkhur lo taka zu siam a tam thu an sawi a; chu'ng zute chu mihring tan a hlauh­awm tih sawiin, dan loa zu siam hmute chu END hriattir ṭhin turin mipui an ngen a ni.