Tla thei dinhmunah Ajax an ding

Europa League Last 32-ah nikum Champions League semifinalist Ajax chuan Getafe 2-0 in khualmualah an hneh lo a, Dutch champion hi tla thei dinhmunah an ding. Second leg hi February 27, Ningani zan hian Amsterdam Arena-ah khelh a ni dawn a, Ajax tan penalty thleng tur pawhin goal hnih tal khung a ngai dawn.

Europa League inkhel dangah English club Wolverhampton Wanderers chuan Espanyol 4-0 zetin an sawp a, Steven Gerrard-a enkawl Rangers-in Sporting Braga 3-2 in an lehthal a, Roma-in Gent 1-0 in an hneh a, Celtic leh Sevilla te erawh Copenhagen leh CFR Cluj ten 1-1 ve vein an chelh.

Dutch Eredivisie-ah Ajax-in point rukin hma an hruai mek a, Getafe mualah an khel chungin ball possession pawh 65% vel daih an chang thei. Dutch club hian vawi 331 ball an in pass theih laiin Spanish club erawhin vawi 165 chiah ball an pass thei a, amaherawhchu Erik ten Hag hoten goal zawnah vawi khat pawh an pet lo.

Spanish club erawhin goal zawnah vawi li an pet a, Palmeiras aṭanga loan hmanga Getafe tana khel mek Deyverson chuan minute 37-naah goal hmahruai a khung. Ajax hmabak tih harsat belhchhah nan Getafe tan Kenedy-a'n injury time-ah goal khat a khung belh leh bawk. Spanish club hi La Liga-ah pathumna an ni mek a, Getafe hi Atletico Madrid chunga awm thei an nih avangin Ajax hi an tla a nih pawhin result mak tih tur a ni lo ang.

Inkhela thil thleng langsar tak erawh Ryan Babel-a tlu a ni. Liverpool leh Fulham forward hlui hian Getafe defender Allan Nyom a titlu a, Babel hian  Sunderland leh Watford defender hi tlu derah a ngai. Kum 33 mi hian Nyom a tih dan zirin a tlu der chiam a, hetah hian duh tawk mai loin Nyom-a bai rualin a bai der leh bawk. Hetichung hian Babel hian Nyom a tihtluk vanga yellow card a hmuh bak hmuh belh loin red card a pumpelh.

Getafe leh Ajax ten ball an chan chhung hi  minute 42 leh second 36 chauh a ni a, kum 2009 hnua Europa League-a team pahnihin ball an chan tlem ber ṭum a ni.

Molineux Stadium-ah Wolverhampton Wanderers an vul a, English club tan hian Jota-a'n hattrick a siam bakah Neves-a'n goal khat khung bawkin Espanyol 4-0 in an sawp.

Pawisa thapna lamah chuan Wolves hi champion tura rinkai pangana an ni pha chauh a, rinkai ber chu Antonio Conte kaihhruai Inter Milan an ni. Chutihrualin season liam ta final-ah English club pahnih Chelsea leh Arsenal te an inhmachhawn a, chuvangin Wolves hi champion thei zingah dah bo a thiang tawh lo.

Wolves boss Nuno Espirito Santo chuan, "Football-ah engmah a chiang lo a, minute 90 khelh tur a la awm. Chutihrualin goal kan chhuah lo a, goal li kan khung. Min ṭantuten nomawi an thlir a nih pawhin an thu a lawm, beisei neih chu a thiang alawm," tiin a sawi.

Ibrox Stadium-ah mikhual Sporting Braga-in bul an ṭan ṭha a, Fransergio (11') leh Abel Ruiz (59') te hmangin hma an hruai hmasa zawk. Rangers tan Ianis Hagi-a'n minute 67-naah si phurh a sut ṭhen a, Joe Aribo-a'n minute 75-naah siphurh a sut. Scottish club an phur chho zel a, Romanian forward Hagi hian minute 82-naah chakna goal a khung.

Steven Gerrard-a'n Europa League match 29-ah Rangers a enkawl tawh a, vawi thum chauh a chak lo. Gerrard hi Liverpool tana a khelh laiin Champions League final-ah ropui takin AC Milan-ah an comeback tawh a, Braga lakah Gerrard-a hote hian goal hnih an phur hnuah minute 15 chhunga goal thum khungin an 'comeback'.