A hun a thleng dawn ta Wilder vs Fury II

Boxing ngainatuten an nghahhlelh chu a thleng dawn ta - Pathianni zing dar 7:30 hian Deontay Wilder leh Tyson Fury te chu a vawi hnih nan an inhnek dawn. 

MGM Grand Garden Arena-a inhnek tur hi India ramah chuan official-a television-a pe chhuak tur an awm lo a, free live streaming site pawh a awm lo. 

Mahse, boxing ngainatute tan chuan ESPN+ leh Fox Sports apps-ah te en theih a ni dawn thung a, boxer rothap pahnih inhmachhawn tur hian infiamna khawvel a luah hneh ta hle. 

Nimin kha boxer pahnihte an inhmachhawn hmaa in buk hun tura tih a ni a, mahse ṭum dang angin boxer pahnih hi hmaichhana inhmachhawnna hun erawh siamsak an ni lo - buaina a chhuah hlauh vang a ni!

Nilaini khan an inhmachhawn hmaa news conference hnuhnung ber chu boxer pahnih hian an hmachhawn a, security an inrawlh har deuh avangin boxer pahnih inkarah buaina a chhuak hman teuh lo. 

Pathianni zinga an inhnek hmaa buaina a chhuah loh nan organiser lam chuan boxer pahnih hi inhnek hmaa an inhmuh an phal tawh lo - buaina chhuak se, inhliam awm se, inhnek phah loh theih a ni a, sum tam tak channa tur a ni dawn. 

Wilder-a promoter Bob Arum chuan boxer pahnih hian 50/50-a hlawkna an insem tur thu a sawi a, khawthlang media ten an tarlan dan chuan boxer pahnih hian dollar maktaduai nga ve ve chu an hlawh dawn chiang sa. 

Hemi piahlamah hian sponsorship aṭanga sum lakluh neuh neuh a awm dawn bawk a, pay-per-view sale aṭangin chan an nei ve bawk ang. PPV maktaduai hnih vel chu sales a awm thei tura ngaih a ni a, a man zat hi $74.99 (Rs. 5,396) a ni. 

Boxer pahnih hian an intawn hmasak khan dollar maktaduai 10 chuang ve ve an hlawh a, kuminah hian dollar maktaduai 20 chuang ve ve an hlawh phak a nih pawhin a mak lo ang. 

Boxer pahnihin hnehna an chan ngei tur thu an sawi ve ve a, boxing legend-te ngaihdan pawh a in ang lo hlawm hle. 

Wilder-a hnek hi a na em em a, Fury hi a knockout ngei ka ring.

 - David Haye

Fury hian Wilder a knockout theih ka ring lo a, points hmanga hnehna a chan ngei erawh ka beisei. 

- Carl Froch

Fury hi boxer ṭha tak a ni tih ka hria a, mahse a tawpah chuan Wilder hi a tharum leh chet ranna hian a puih ka ring a ni. 

- Sugar Ray Leonard

Boxer hnek na tak hi chu en liam mai chi an ni lo. Wilder hi a hnek nat danah chuan Tyson nen ka khaikhin hial a, round 10-naah knockout hmanga a chak ka ring. 

- Manny Pacquiao

Fury hian points hmanga hnehna a chan mai ka beisei a, chutihrual chuan fimkhur erawh a mamawh khawp ang. 

- Paulie Malignaggi

Wilder hi knockout hmanga a chak mai ka ring a, mahse min zawt nawn leh a nih chuan points hmanga Fury chak tur thu ka hrilh ang che u.

- Carl Frampton

Wilder hian a tih tur ang chu a ti vek a, a inrintawkna nena ka enkawp phei chuan a chak zawk ka ring. Boxer hnek na satliah a ni lo a, hma a sawn zel a ni. 

- Evander Holyfield

Hetiang renga rin tur zawk thlan theih loh hi ka la nei ngai lo. 50-50 ah ka ngai. 

- Shawn Porter

Wilder hian ka hriat sa a theihna ang kha a pho chhuak a nih chuan round sarihna emaw round riatnaah Fury hi a knockout ang.

- Larry Holmes