Thiem-a'n quarterfinal a lut

Australian Open finalist Dominic Thiem chuan Rio Open-ah quarterfinal a lut. Austrian tlangval hian semifinal lut turin seeded chang phak lo Gianluca Mager a paltlang leh a ngai ang.

Nimina last 16 inkhelah Thiem hi awlsam takin a chak mai bik lo, a khingpui Jaume Munar nen a inkhel tawk hle; darkar hnih leh minute 41 an inkhelh hnuah erawh 6-7 (5-7), 6-3, 6-4 in hnehna a chang ta zawk.

Seeded pakhatna Thiem-a'n 2017 khan ATP 500 event-ah hian hlawhtlinna a lo chang tawh, quarterfinal-a a khingpui tur Mager hian inkhel dangah Italian tlangval Joao Domingues chu 6-3, 7-6 (7-5) in a lo hneh ve bawk.

Mipa tennis inelna dang Delray Beach Open lamah erawh champion tura rinkai Milos Raonic a chak lo. Service nei ṭha Raonic hian vawi 11 ngawt aces vaw chhuak thei mah se Cedrik-Marcel Stebe lakah 7-5, 6-3 in a chak lo.