Ran chaw leh saa intodelh turin hma kan la - AH&Vety Minister

AH&Vety minister Dr K Beichhua chuan nimin khan Ramrikawna ár chaw herna hmun leh Tanhrila artui tihkeuna hmun a tlawh a; kuminah ran chaw leh saah intodelh turin hmalak nghal a nih thu a sawi.

Ramrikawna ran chaw herna kháwl thawm ṭhat ngai leh in chung phui lo thawm ṭhat ngaite chu siamṭhat nghal a nih tur thu sawiin Dr K Beichhua chuan, "Tih tak zetin saa intodelh turin hmalak a ni. Ran chaw khamkhawp kan neih a ngai a, chumi tur chuan Agriculture department nen ṭanghoin tunah hian tualchhunga vaimím chìnte kan lei khawm mek a ni," a ti.

Dr K Beichhua chuan, vaimim quintal 10,000 chuang lei an beisei laiin qtl. 450 vel chauh lei tur an hmu rih tih sawiin, "Tunah hian ram dang aṭanga vawk lak luh kan khap mek a ni," a ti a; tualchhung mi ṭhalai leh hetiang lama tuite'n vawk farm nasa takin an siam a, tualchhunga thar aṭangin vawk vulh turah chuan intodelh theih a beisei thu a sawi.

AH&Vety Minister chuan, ár tihkeuna hmun tam zawk siam turin sorkarah an dil mek thu sawiin, "Tuna ar tihkeu theih zat kar khata 20,000 ni ṭhin hi ruahmanna thar an peih hunah chuan 60,000 tihkeu theih tawh dawn. Ram dang aṭanga la lut loin arsa leh artuiah intodelh theih kan beisei," a ti.

Ramrikawnah hian bawng, vawk leh ar chawte her mek a ni a, ni khatah quintal 110 vel her chhuah theih a ni.