Revival Meet
June 22, Zirtawpni aṭang khan Bawngkawn Kohhran biak-inah Synod Revival Meet vawi 7-na neih a ni a, nizan khan a ṭiak. Revival Meet hi Synod hnuaia revival team-te intuaitharna atana buatsaih a ni a, thupui chu 'Sim rawh u' tih a ni.
KHAWTHLIR
Ruihhlo beihpui
Saitual-III Joint Action Committee chuan June 22, Zirtawpni zan leh Inrinni khan Chawnpui Branch YMA Hall-ah ruihhlo beihpui an thlak. Zirtawpni zanah nu leh pate pualin inkhawm buatsaih niin, Inrinni chhunah naupang/tleirawl kum 9 - 15 inkarte pualin inkhawm an buatsaih a ni.
Thisen pe
ṬKP Coordination, Aizawl chuan Inrinni khan Bawngkawn BCM kohhran hall-ah blood donation camp an huaihawt a, Zemabawk bial, Ramhlun bial leh Bawngkawn bial ṬKP member mipa 126 leh hmeichhia 23-te'n Aizawl Civil Hospital tan thisen unit 149 an pe. Inrinni vêk ṬKP Hnahthial North Bialte'n Hnahthial Electric North kohhran sunday school hall-ah thisen an pe a, Lunglei Civil Hospital tan unit 55 an pe a ni.
MPF seminar
Mizoram People Forum (MPF) chuan June 23, Inrinni khan nilêngin Lunglei Farm Veng Presbyterian Kohhran Hall-ah political education seminar an buatsaih. Inrinni zan aṭang khan Presbyterian Kohhran Lunglei Chanmari bial chhunga kohhran hrang hrangah political education campaign an nei nghal bawk a; MPF general secretary Rev.Dr R Lalbiakmawia leh Synod Family Guidance & Councelling Centre-a counsellor Rev. C Lallungmuana ten hun an hmang a ni.
IKK inzawmkhawm tura rawtna pawm
Isua Krista Kohhran (kraws vár) Assembly Executive Committee member te, June 22, Zirtawpnia Upper Republic-a an headquarters office-a ṭhukhawm chuan, Vaivakawna headquarters nei IKK (kraws sen) Assembly office bearers joint meeting-a inzawmkhawmna tura inremna thuthlung an duan chu an pawm a, tihhlawhtlin a nih theih nan a ṭul anga hmalak zui ni se, an ti. IKK (kraws var) meeting hi an chairman Upa Lalremliana'n a kaihruai a ni.