Chennaiyin tan Jeje a vul

Mizo tlangval Jeje Lalpekhlua'n Indian football history-ah a hming a nem kai leh ta a, Chennaiyin FC chu Indian Super League club zingah AFC Cup group stage khel hmasa ber ni turin hnehna a chanpui.

Season duhawm lo tak hmangtu Chennaiyin hian an mikhual Colombo FC chu AFC Cup playoff second leg-ah 1-0 in an hneh a, first leg-ah goal khung loa an inhnehtawk tawh bawk avangin a tlang zawkah an ṭang zui. 

Hnahthial tlangval Jeje hian minute 68-naah he inkhela goal awmchhun hi a khung a, Colombo lamin a chhanletna tur an nei lo. Jeje bakah hian Isaac Vanmalsawma leh Laldinliana Renthlei te chuan inkhel bul an ṭan bawk. 

AFC Cup-ah hian Chennaiyin hi Group E-ah an awm dawn a, I League champion Minerva Punjab, Bangladesh club Dhaka Abahani leh Nepali club ṭha Manang Marshyangdi Club te nen group khatah an awmho ang a, an match hmasa ber hi April 3-ah Minerva nen an khel ang. 



Share this Post

Login to comment
No Comments