Edmund tan Federer thiam lua

Roger Federer chuan Kyle Edmund hnehin BNP Paribas Open quarterfinal a lut a, inkhel dangah Rafael Nadal a chak bawk - player ṭha pahnih hi an tlang chho zel a nih pawhin final hma chuan an inhmachhawn dawn lo.

Indian Wells-a vawi nga champion tawh Federer hian darkar khat chhung vel chauhin Britain tlangval hi 6-1, 6-4 in a hneh. Swiss star hian inelna a hmachhawn tluang hle a, tun tournament bikah hian set a la hloh miah lo - Edmund lakah hian a service hmasa aṭangin 79% ngawt point a hmu.

Grand Slam vawi 20 champion tawh Nadal hian March thlatir khan Dubai-ah ATP title 100-na a la tling chiah a, tun ṭuma a hneh tak Edmund hian kar hmasa mai khan Indian Wells inbuatsaihna, second division huang Challenger-ah hawhtlinna a chang - inrintawkna nei sang pahnih inkhelah tawnhriat ngah zawk Federer a chungnung hle.

Kum 37 mi Federer hian a match lehpekah chuan Hubert Hurkacz a hmachhawn leh dawn, world number 67 Hurkacz hian seeded 24-na Denis Shapovalov chu 7-6 (7-3), 2-6, 6-3 in a lo hneh ve bawk a ni.

Inkhel dangah Nadal pawhin harsatna a tawk lo. Spanish tlangval hian Filip Krajinovic lakah 6-3, 6-4 in hnehna a chang, break point vawi li a hmuh zinga vawi thum a tihlawhtling. Nadal hian John Isner hnehtu Karen Khachanov a hmachhawn leh dawn a, tlang tura ngaih ni mah se round hmasa lam ai chuan a hautak tawh dawn.

Nadal leh Federer te ang bawkin fourth round inkhel dangah Milos Raonic chuan Jan-Lennard Struff lakah break point vawi thum inchhanhim vekin 6-4, 6-3 in hnehna a chang. Seeded 13-na hian Gael Monfils leh Philipp Kohlschreiber te inkhela chak zawk a hmachhawn leh ang.



Share this Post

Login to comment
No Comments