Messi ropuinain Lyon a hliahkhuh

Cristiano Ronaldo-a'n ropui taka Real Madrid a chhanhim hnu lawkah Lionel Messi a lang ve lehnghal a, Barcelona chu Lyon lakah 5-1 in hnehna a chanpui. 

Champions League last 16 first leg-a team pahnih an intawn ṭumin goal khung loin an inhnehtawk a, Lyon hian beiseina sang tak nei chungin Nou Camp an pan. 

Mahse, French club-in an beisei ang result an hlawh chhuak thei lo a, Nou Camp-a Messi ropuizia hmu tura kal ang chauh a ni - Argentine forward ropuina hmaah an zamral. 

Messi hian goal hnih a khung bakah assist vawi hnih a nei a, Philippe Coutinho, Gerard Pique leh Ousmane Dembele ten goal khat ṭheuh an khung bawk a, Lyon tana Lucas Tousart goal khungin awmzia a nei lo. 

Messi leh ropuina

Khawvel media ten tui ti taka Ronaldo chanchin an sawi reng laiin Messi-a'n chanchin dang ziah leh sawi tur a chhawp chhuak ve lehnghal a, Lyon an mikhual zanah inkhel ṭantir aṭangin a hmuhnawm nghal. 

Messi hian minute 17-na lekah goal hmahruai a khung a, Luis Suarez penalty hlawhchhuah chu inkhel boruak sangah 'cool' zetin panenka hmangin a pet goal - Lyon tan beisei a bo nghal ang thawthanga sawi theih a ni. 

Minute 78-naa Messi goal pawh goal ropui bik a ni. Argentine striker hian yard 30 vel zet chu ball a khalh a, nuamsa taka defender pahnih a bum hnuah a goal hnihna hi a khung - Champions League match 31-ah goal hnih aia tlem lo a khung tawh!

Messi-a'n a goal hnihna a khung hnuah hian Gerard Pique leh Dembele goal khung tur a siamsak bawk a, harsatna nei loin Barca-in hnehna an chang. 

Hei le Coutinho

Lionel Messi-a'n goal hmahruai a khung hnuah tun hnaia sawisel hlawh leh fan-te ngeiin an 'boo' khum Philippe Coutinho chuan goal khat a thawh ve bawk a, theihna a la nei reng tih a pholang. 

Manchester United nena sawizawm hlawh reng midfielder hian season hmasaah Barca tan hun duhawm tak hmang mah se tun season-ah beisei a phak lo a, Rayo Vallecano nen an inkhelh ṭum phei chuan fan-ten an au el hial. 

Mahse, Lyon lakah inkhel bul rawn ṭanin minute 70 thleng a khel a, a hun ṭha neihah goal a khung bawk avangin Barca fan-te pawhin an huatna a reh leh ṭan tawh ang. 

Hetihlai hian goal a khung lo chungin Luis Suarez hming lam hmaih theih a ni lo. Liverpool striker hlui hian penalty a hlawh chhuak a, Coutinho goal khung hi a siamsak a ni bawk. 

Beiseina thamral

Lyon hian an mualah Barca an chelh avangin Nou Camp-ah beiseina an nei sang a, first leg-a hrem vanga inlan thei lo captain Nabil Fekir a lo kir bawk avangin a awm lo hran lo. 

Minute 31 chhunga goal hnih an chhuah chungin minute 58-naah Lucas Tousart chuan volley hmangin si phurh a rawn sut ṭhen a, goal khat dang an khung leh phawt chuan away goal rule hmangin an tlang daih thei dawn. 

Mahse, Lyon tan Nabil Fekir leh Memphis Depay ten an hun ṭha neih an chhawr thei lo zui. Lyon manager Bruno Genesio-a'n thutlukna huaisen thlak tak siam zuiin defender Ferland Mendy a la chhuak a, a aiah forward Maxwel Cornet a luhtir. 

Lyon coach-in thutlukna a siam sual a, substitution a siam hnu lawkah Messi zawkin goal a rawn khung leh a, thawhleh ngaihna a awm tawh lo - French club hian first half-ah first-choice goalkeeper Anthony Lopes chu hliam vangin an chan bawk a, an duh chuan chhuanlam tur an nei. 



Share this Post

Login to comment
No Comments