UEFA Champions League Quarterfinal-ah Premeir League club pali

Europe-a football inelna sang ber Champions League-ah England-in club pali an thawh dawn a, tun season hi kum 10 chhunga a thlen lehna hmasa ber a ni.

Premier League-a la champion ngai lo Liverpool-in Germany-a roreltu Bayern Munich an hneh a, Sir Alex Ferguson-a chhuah hnua league-a la champion leh lo Manchester United-in France awptu Paris Saint Germain an hneh.

Manchester City-in dimdawina nei loin Schalke an sawp a, English club pali zinga buk rit lo bera ngaih Tottenham Hotspur pawhin German club ṭha Borussia Dortmund hneh turin harsatna liantham an tawk lo bawk.

Thawnthu hlui

English club-in 2000s chanve chho vel khan Champions League-a an tawn san ber hun an tawng a; Chelsea, Arsenal, Liverpool leh Manchester United te chuan 2007-08 leh 2008-09 season khan quarterfinal an thleng vek.

Hei chauh hi ni loin 2004-05 leh 2008-09 chhung khan English club pakhat talin Champions League final an lut ziah. Liverpool, Manchester United leh Chelsea te chuan vawi khat ṭheuh nomawi chawiin vawi khat ṭheuh final-ah an chak lo a, final lut zingah Arsenal erawhin nomawi an chawi lo thung.

Tun hnaiah erawh English club an tlahniam a, season liam ta khan Liverpool-in final an lut tih loh chu kum nga chhung tawp final-ah English club an awm lo. Chutihrualin kum sarih liam ta khan Chelsea chuan nomawi an chawi a, hemi hma kum hian Manchester  United-in final lutin Barcelona lakah an chak lo thung.

Ranking thlir ila

England club ten player lakluh nan sum an seng hnem a, player ṭha an kawl rah an seng chho mek. Amaherawhchu nomawi chawi tur chuan ṭha ber nih a ngai a, Europe club ṭha ber an kawl em tih zawhna a awm thung.

UEFA club ranking-ah chuan quarterfinal lut zingah Barcelona (3rd) leh Juventus (5th)  te chu English club chunga awm an ni a, English club zingah Pep Guardiola enkawl Manchester City (7th) an sang ber a, chutihrualin nikum finalist Liverpool hi 16-na chauh niin Manchester United (15th) hnuaiah awm mah se an khelh dan phung thlirin champion rinkai zingah an tel pha thung. Club dang pathum FC Porto (9th), Tottenham (18th) leh Ajax (22nd) te erawh a awm nem tura ngaih an ni.

English club dinhmun chu

Pep Guardiola chuan Manchester City hi Champions League-ah chuan tleirawl chauh tiin pressure lak bo tum mah se quarterfinal lut tura Schalke 7-0 ngawta an sawp avang leh sum an sen nasat avangin en rawn an ni tho tho dawn.

Liverpool hi season liam ta final an thlen kum aiin an ṭha tawh zawk a, goalkeeper chesual Lloris Karius thlak nan Brazil no. 1 Alisson an lalut a, midfield thuam chak nan Fabinho leh Naby Keita te an lalut a, an squad hian ṭum dang zawng aiin belhchian a dawl.

Manchester United-in Ole Gunnar Solskjaer hnuaiah harhtharna an chang a, Norwegian manager hian a chhawr theih tura player an  chhawp sak player manto leh rawlthar rual chawhpawlhin champion rinkai ni pha lo mah se PSG hnehtu an nih avangin tum châkawm an ni tawh lo.

Tottenham pawhin puitlin lam an pan zel a, Mauricio Pochettino hnuaiah stadium thar sa chungin an tlo tlat a, Premier League lamah Arsenal, United leh Chelsea chunga an awm avangin dah hniam theih an ni lo. Hei chauh hi ni loin Harry Kane, Christian Eriksen, Son Heung-min leh Hugo Lloris te chu ram khat rinrawl ni pha an ni a, eng team pawh hneh thei an ni.

Messi leh Ronaldo

England hian quarterfinal-ah club pali ngawt thawh mah se player ṭha ber pahnih Lionel Messi leh Cristiano Ronaldo te an kawl loh avangin Spain leh Italy chunga awm an la harsat dawn.

Naktuk tlai dar 4:30 hian Nyon-ah draw neih a ni dawn a, tuna a lan dan chuan semifinal-ah English club an awm ngei dawn. Amaherawhchu nomawi chawi tur chuan Messi telna Barcelona leh Ronaldo telna Juventus te aiin an buk a rit lo zawk.



Share this Post

Login to comment
No Comments