Australia-in India an hneh

India chuan an buzawlah Australia an hneh lo a, Aussies hian Nilaini khan ODI match nganaah run 35-in hnehna an chang a, 3-2 in series an la.

Australia hian ODI match hmasa pahnihah an chak loh hnuin a tho chhuak leh a, match hnuhnung berah hian bat hmasak an thleng. Aussies hian wicket kua hlohin run 279 an siam a, India hian run 237 chiah an vaw chhuak thung.

Khawaja century

Australia tan opener Usman Khawaja a che ṭha nawn a, ball 106 lek aṭangin run 100 a vaw chhuak. Kum 32 mi Khawaja hian ODI hnuhnung bera century siamtu Peter Handscomb lak aṭangin thlawpna a hmu ṭha a, ani hian run 52 a siam ve bawk.

Indian bowler zingah Bhuvneshwar Kumar khel ṭhain run 48 pein wicket thum a la a, amaherawhchu over 10 vawm zingah Kedar Jadhav chuan run 74 lawih a pe a, wicket khat chauh a la a. Australia run vuak chhuah zat run 272 chu umphak huphurhawm tham a tling.

Beisei pha lo batsman

India batsman tan Australia target chhawpchhuah sak hi thil theih a ni a, mahse beisei angin bul a ṭan lo. Run 15 chiah an siam tihin Shikhar Dhawan-a'n a thi a, a kawppui Rohit Sharma pawh India tana siam hnem ber nichungin run 56 chauh a siam.

Match pawimawhah Virat Kohli-a'n run 20 bak a siam lo a, Kedar Jadhav (44) leh Bhuvneshwar Kumar (46) te chet ṭhat chuan awmzia a awm pha lo. India hian over 50-ah run 237 an siam a, an thi vek a, an mualah an tlawm.

Kum 2009 hnuah 

Australia hian kum 2009 khan Ricky Ponting-a captain-na hnuaiah India ramah ODI series 4-2 in an la a, tun ṭum hi hemi hnua an lak leh theihna hmasa ber a ni. 

Captain Aaron Finch chuan, "Hnehna kan chan dan hi a ropui ka ti a, kan beih let dan hi a chhuanawm ka ti. Mi tam takin tun hnaiah min ring lo a, amaherawhchu World Cup-ah pawh kan champion thei tih kan pholang a ni," tiin inrintawkna an neih let leh tawh thu a sawi.

Aussies hian captain leh vice captain hlui Steve Smith leh David Warner te chu nikum March thlaa ball-tampering vangin thla 12 an hrem a, World Cup-ah chuan an rawn kir hman dawn a, thlan an ni dawn em tih erawh a chiang lo thung.

Intuai hriam nan IPL

India captain Virat Kohli chuan, "Kan khelh dan avangin pressure kan neih phah lo a, kan thutlukna siamah harsatna kan neih phah lo. Dressing room-ah chuan thla hnih chhun khelh tur IPL-ah nuam ti taka khel turin kan inhrilh," tiin an chak loh vanga hnual loin IPL hmanga World Cup atana an inpuahchah a ṭul thu a sawi.

May 30 leh July 14 inkarah Cricket World Cup chu England leh Wales-ah khelh a ni dawn a, kum 2015-a inelna neih hnuhnung berah khan India hian champion zui ta Australia chu semifinal-ah an hneh lo. 



Share this Post

Login to comment
No Comments