Sala ruang hmuh hnuah Cardiff chak

Cardiff City-in an player manto ber Emiliano Sala chhawr hman ta lo mah se a boruak a lian chhunzawm a, a ruang an hmuh hnua an match hmasa berah hnehna an chang. Inrinni zan inkhelah Southamton an hmachhawn ṭumin sunna hun hman a ni a, 2-1 in hnehna an chang.

Premier League table mawng lama talbuai mek pahnih inkhelah Cardiff lamin minute 69-naah Sol Bamba hmangin goal hmahruai an khung. Saints lamin minute 90 chiahah Jack Stephens hmangin sut mah se, hun tawp hma chiahin Kenneth Zohore-a'n chakna goal a khung.

Neil Warnock-a enkawl Cardiff-in point thum an hmuh avangin relegation zone an chhuahsan rih a, chak lo Saints erawh tla hniam thei dinhmunah an ding thung.

Southampton manager Ralph Hasenhuttl chuan, "Tun anga kan khel ṭha lo chhunzawm a nih chuan Premier League a inhamtan zel a huphurh awm ang," tiin an hmabak a hautak tur thu a sawi.

Inkhel dangah Watford chuan an manager hlui Marco Silva enkawl Everton chu 1-0 in an hneh a, goal awmchhun hi Andre Gray-a'n minute 65-naa a khung a ni. Crystal Palace leh West Ham te chu 1-1 in an inhnehtawk thung, Hammers midfielder Mark Noble-a penalty chhuih luh chu Wilfried Zaha-a'n a sut sak a ni.



Share this Post

Login to comment
No Comments