Madrid derby-ah Real an chungnung zawk

Inrinni zan khan Madrid derby khelh a ni a, Real Madrid chuan an mikhualna ramah Atletico Madrid chu 3-1 in an sawp a, table-ah pawh an khaw club hi an lehpel nghal.

Real-in hnehna an chan avangin champion an sawi ri ngam ve leh ta a, Atletico erawh nomawi an beiseina a ral tial tial - Copa del Rey aṭangin an tlak tawh bawk avangin kut ruaka season khar a hlauhthawnawm ta hle. 

Atletico hian kar hmasa lawk kha chuan point thuma hmahruaitu Barca hnaih theihna hun ṭha an nei a, mahse a zawna league match hnih an tlawm takah chuan match khata khel tam zawk chungin Barca hi point rukin an thlau tawh. 

He thu buatsaih a nih lai hian Real Madrid hian point nga chauhin Barcelona an thlau. Mahse, Barca hi nizan khan an inlan a, result-a zirin Real nena an inthlauhna hi a danglam leh thei ang. 

Goal a lut hma

Atletico khelmuala inkhelah goal a lut hma a, goal khung hmasa zawk erawh mualneitu ni loin Real Madrid an ni - minute 16-naah vengtu nei lo Casemiro chuan acrobatic volley hmangin a pet lut. 

Mualneitu team lamin ngawi renga thlir liam an tum lo. Atletico thiampuipa Antoine Griezmann chuan Angel Correa-a ball pek ṭha tak chu a tlan luhpui a, goal an chhuah aṭanga minute kuanaah si phurh sut nan a hmang. 

Atletico tan beisei angin thil a kal lo. Chawlhlawk hman nan minute thum chauh a awm tawh tihah referee-in mualneitu team penalty spot lam a kawk a, Jose Maria Gimenez chuan khel ṭha em em mai Vinicius Jr a ti tlu a, penalty a chawi. 

Real tan penalty pet turin captain Sergio Ramos a rawn pen chhuak a, Spanish defender hian goal-ah chantirin tun season-a goal 11 a khungna chiah a ni.

A la tawp lo

Atletico Madrid-in si khat phur sa chungin chawlhlawk an hmang a, mahni khelmuala inlan an nih miau avangin fan-te beisei a bo lo a, Real lakah comeback theih an inbeisei. 

Mahse, beisei angin thil a kal lo. Real coach Santiago Solari-a'n kum 18 mi khel ṭha tak Vinicius Jr a la chhuak a, Brazilian forward aiah hian Welsh forward Gareth Bale a dah lut.

Solari-a substitution siamin minute 27 hnuah awmzia a nei nghal a, Gareth Bale chuan an goal thumna a khung. Hliamin a tihbuai avanga a nih tur ang ni pha lo nia an sawi ṭhin Bale hian Real tnaa goal 100 a khungna chiah a  ni a, heti zat goal khung tur hian match 217 a mamawh.

Minute 80-naah Atletico Madrid defensive midfielder Thomas Partey-a ṭang ulh a, Toni Kroos a tih tluk avangin a yellow card pahnihna a hmu - hnawhchhuah a ni a, si hnih phur chunga player sawma khel Atletico tan Real lehthal ngaihna a awm tawh lo. 

Morata mangchhia

Chelsea aṭanga Atletico pantu, Real Madrid striker hlui Alvaro Morata tan English football-a a mangchhia a la reh thei lo a, Spanish football thlengin a umzui. 

Morata-a'n Atletico a pan hma khan Madrid khaw club hi an match hnuhnung 19-ah an tlawm miah lo a, mahse Morata an lakluh hnua match hnih an khelhah erawh an tlawm ve ve!

Kum 26 mi striker hian 2-1 a an tlawm laiin mawi zetin Atletico keeper hlui Thibaut Courtois-a 'chip' khum a, goal vangin Atletico fan-te lawm hman viau mah se video assistant referee (VAR) hmanga ennawn a nih hnuah offside vangin pawm a ni lo. 

Atletico hian 2017-a Wanda Metropolitano an luah hnuah an khelmualah first half chhunga goal vawi hnih chhuah an la nei ngai lo a, Real lamin an thaichhiat sak ta.



Share this Post

Login to comment
No Comments