Aizawl FC khelh hun an sawn

Nimin khan Gokulam Kerala leh Aizawl FC chu EMS Stadium, Kozhikode a inkhel tur an ni a, amaherawhchu Kerala club hi Srinagar-ah vur a tlak nasat avangin Jammu and Kashmir khawpui hi an ruahman hunah an chhuahsan theih loh avangin inkhelh hun sawn a ṭul phah ta a ni.

Gokulam leh AFC inkhel tur bakah hian nimina Real Kashmir leh East Bengal khelh hun pawh sawn a ni a a, an inkheh hun tur fixtures hi tihchian a la ni lo. Mizo club hian vawiin hian Kerala an rawn chhuahsan a, February 16 hian Mohun Bagan an mikhual dawn.

Kolkata club ṭha Mariners hian Inrinni khan Churchill Brothers an tlawh a, Tilak Maidan-ah 1-1 in an inhnehtawk. Bagan hian Asier Pierrick Dipanda Dicka hmangin minute 39-naah hma an hruai a, amaherawhchu Goan club-in Anthony Wolfe penalty hmangin minute 78-naah an siphurh an sut.

Mohun Bagan hian hnehna an chan zawh loh avangin paruknaah point 23 hmuin an awm a, Aizawl FC nen an inkarah Indian Arrows chiah an awm a, Mizo club hian hnehna an chang thei a nih chuan pasarihnaah an invawrhchho thei ang.

Aizawl FC leh Bagan inkhelh hunah hian I League-a Mizo club champion puitu Khalid Jamil chuan Kolkata club hi a rawn enkawl dawn a, hei vang hian Mualpuia inkhel tur hi a en a châkawm hle.



Share this Post

Login to comment
No Comments