PSG striker Cavani a inhliam

Paris St-Germain manager Thomas Tuchel chuan, "Edi dang kan nei lo," tiin Bordeaux nen an inkhelh ṭuma Edinson Cavani inhliam pawi a tih thu a sawi.

Inrinni zan khan Parc des Princes-ah PSG-in minute 42-naa Cavani penalty hmangin Bordeaux 1-0 in an hneh a, amaherawhchu inhliam vangin Uruguayan forward hian first half bak a khel lo.

French champion hian Ligue 1-ah match khata khel tlem chungin point 13 zeta hma an hruai tawh avangin an champion nawn ngei a rinawm tawh a, amaherawhchu sum ṭahnem tak an sen chhan Champions League-ah an player pawimawh chhawr thei lo dinhmunah an ding.

PSG hian Thawhlehni zanah Manchester United chu Old Trafford-ah an tlawh dawn a, Champions League last 16 first leg-ah hian Neymar chu inhliam vangin an chhawr thei dawn lo chiang a, Cavani dihmun a la hriat loh.

Thomas Tuchel chuan, "Cavani dinhmun hrechiang turin hun kan mamawh a, kan hriat chian erawh a ṭha lo. United kan hmachhawn hunah kan chhawr thei dawn em tih ka la hre thei lo a, a buaithlak khawp mai. Edi dang kan lo a, Neymar dang pawh kan nei lo," tiin a sawi.

PSG hian Neymar-a awm loh an tuar a, kar harsa tak an tawk chho mek. French champion hian Lyon 2-1 in an hneh lo a, league-a an chak lohna hmasa ber a ni a, Nilai zan khan third tier club Villefranche chu French Cup-a hneh turin extra time an mamawh bawk.

Tuchel hian Bordeaux an hmachhawn ṭum hian Kylian Mbappe chu a hahchawlhtir a, amaherawhchu Cavani ber a inhliam tak avangin French rawlthar duhawm hi second half-ah luhtir a ni.

Hetihlai hian an khingpui tur Manchester United-in Marcus Rashford an awltir thei a, Fulham 3-0 zeta an hneh avangin Paul Pogba leh Ander Herrera te an lachhuak hma thei thung.



Share this Post

Login to comment
No Comments