Champion lai PSG an tla

French League Cup champion lai Paris Saint-Germain chu Ligue 1 mawngphaha awm Guingamp hneh loin quarterfinal-ah pet tlak an ni a, cup inelna bikah a zawna match 43 an chak tluan tawhna chu a tawp.

Nilaini zan inkhelah PSG lam hian Neymar hmangin minute 62-naah goal hmahruai an khung a, an khelmual hman thiam Parc des Princes-a inkhel an nih avangin harsa lutuk loa chak thei tura ngaih an ni.

Mahse, beisei ang ngawtin thil a thleng lo. Thomas Tuchel-a enkawl PSG tan Kylian Mbappe, Neymar leh Angel Di Maria te awm mah se goal an khung belh lo a, Guingamp lamin hun tawp dawnah penalty vawi hnih an hmuh chhawr ṭangkaiin Yeni Ngbakoto leh Thomas Meunier ten goal an khung a, beisei loh zawkin hnehna an chang.

German manager Tuchel kaihhruaina hnuaiah PSG hian tun season chhungin vawi hnih chiah chak loh an la nei, Champions League group stage-ah Liverpool an ngam loh leh Guingamp an hneh lohte chiah hi an tlawm awmchhun a ni.

A zawna season nga chhung nomawi an kawl tawh an chan a, PSG manager Tuchel tan result duhawm lo tak a ni. Tuchel chuan, "Inrintawkna nen nuam ti takin kan khel a, hun ṭha pawh vawi tam tak kan insiam thei. Chutichung chuan goal khat bak kan khung thei si lo.

"Ka hmuh dan chuan hun tawp dawna penalty vawi hnih kan chawi kha pek loh theih kan ni. Kan vanduai ṭum a ni a, chutih rualin kan khingpui Guingamp lam kha an vannei takzet a ni," tiin a sawi.

Quarterfinal inkhel dangah Thierry Henry enkawl AS Monaco chuan hun pangngaiah Rennes chu 1-1 a an inhnehtawk pui hnuin, penalty shoot out-ah 8-7 in an hneh. Monaco bakah hian Strasbourg leh Bordeaux ten semifinal an lut ve bawk.



Share this Post

Login to comment
No Comments