Copa del Rey Leganes sawptu Real an insiamṭha

Spanish La Liga-a an match hnuhnung pahniha hnehna chang zo lo Real Madrid chu Copa del Rey lamah an insiamṭha a, round of 16 first leg-ah an mikhual Leganes chu 3-0 in an sawp.

Real Madrid tan Sergio Ramos, Lucas Vazquez leh Vinicius Junior ten goal khat ṭheuh an khung a, Leganes lamin a chhanletna tur an neih loh avangin 3-0 in Real an chak. 

Copa del Rey last 16 hi double leg-a khelh ni mah se 3-0 ngawt an chak tawh avangin Real tan hlauhthawn tur a awm tawh lo niin a lang a, Leganes khelmuala an lenluh hunah hahdam zawkin an khel thei ang. 

Madrid khaw club dang inkhelah Atletico Madrid-in Girona khelmualah hnehna an chang zo lo a, Antoine Griezmann chuan minute kuana lekah goal hmahruai mah se an mikhualna ramah Girona nen 1-1 in an inhnehtawk.

Ramos = 100

Real Madrid-in minute 44-naah penalty an hlawh chhuak a, a pet turin Sergio Ramos a lo pen chhuak. Real captain hian harsatna nei loin goal-ah a chantir a, a career-a goal 100 a khungna chiah a ni!

Ramos-a'n a career-a goal 100 a khung tling thei hi forward leh midfielder tan chuan a mak lo a ni mai thei a, mahse centre back goal khung atan erawh a tam tham hle - defender zingah goal 100 khung tling thei an tam lo. 

Kum 32 mi defender hian La Liga-ah goal 59 a khung a, Copa del Rey-ah goal nga, Champions League leh Europa League-ah goal 12, Super Cup leh Club World Cup-ah goal sarih, Spain tan goal 17 a khung. 

Ramos hian Malaga lakah goal khung hnem berin goal nga a khung a, Barcelona lakah goal li ngawt a khung bawk - tun seasomn bikah match 27 khel tawhin goal sarih a khung.

Goal hnih dang

Real hian goal dang khung leh tur erawhin hun an mamawh rei hle - minute 68-naah Lucas Vazquez chuan an goal hnihna a khung ve leh chauh a, Vinicius Junior chuan minute 77-naah an goal thumna a khung leh bawk. 

Kum 18 mi Vinicius Junior hi euro maktaduai 46 vela Real Madrid pantu rawlthar duhawm kha a ni a, a hun tir lamah reserve team lamah hun hmang tam zawk mah se Santiago Solari coach a nih hnuah hmun pawimawh a chang ve zel. 

Brazilian forward hian Real senior team tan inelna hrang hrangah match 13 khel tawhin goal thum a khung a, hun tawp hnaih lamah amah ang thoa rawlthar duhawm Brahim Diaz chuan a thlak. 

Kum 19 mi Diaz hi pound maktaduai 21 man hua Manchester City aṭanga Real Madrid pantu kha a ni a, Spanish club a zawm hnua an match hmasa berah bench aṭanga luhtir a ni nghal a ni. 

Atletico an zuai

Real-in hahdam taka hnehna an chan laiin an khaw club ve tho Atletico Madrid erawhin khualmualah hnehna an chang zo lo a, hahdam taka second leg khelhna hun ṭha an pumpelh tihna a ni. 

Atletico tan tun hnaia 'form' em em mai Antoine Griezmann chuan a match hnuhnung pali-a a goal lina ni turin minute kuana vel lekah hmahruaina goal a khung a, awlsam takin hnehna an chang dawn niin a lang hman. 

Mahse, Girona hian hun tam pawh a liam hmain minute 34-na lekah Anthony Lozano hmangin an si phurh hi an sut a, Atletico an hawihai - hnehna chan ngei tumin an nawr chhunzawm a, Angel Correa, Nikola Kalinic leh Vitolo ten hun duhawm nei vek mah se goal-ah an chantir thei lo. 

Atletico-in hnehna an chan zawh loh avangin chiang taka an dinhmun sawhnghet tur chuan January 16 an nghah thlen leh phawt a ngai dawn tihna a ni a, kar leh Nilaini zanah hian Girona hi mikhual ve thungin second leg an khel ang.



Share this Post

Login to comment
No Comments