Zanin Asian Cup a hmuhnawm dawn

Asian Cup-ah zanin hian inkhel pathum a awm dawn a, a hmuhnawm dawn tia sawi ngam vek a ni - champion ngam ṭhah Australia, China leh South Korea an inlan dawn. 

Australia hian tlai dar 4:30-ah Palestine an inkhelhpui dawn - an match hmasa berah rin loh takin Jordan an hneh lo a, knockout round luh an tum chuan zaninah Palestine an hneh ngei a ṭul tawh ang. 

Mahse, Australia tan Palestine hi awlsam taka hneh tur an ni bik lo. Palestine hian an match hmasa berah Syria chu goal khung loin an inhnehtawkpui a, Asian champion lai Australia hi an hneh thei a nih chuan last 16 lut chiang angah an inchhal thei ang. 

Zanin dar 7:00-ah China leh Philippines an inkhel dawn a, hei hi hmuhnawm tur chu a ni - China hian match hmasa berah Kyrgyzstan hneh mah se beisei an phak lo a, vanneih vanga chak anga chhal theih an ni - 2-1 in an chak a, an goal hnih khung hi goalkeeper chetsual vang ve ve a ni. 

Philippines hian an match hmasa berah South Korea chu 0-1 in an ngam lo a, England boss hlui Sven-Goran Eriksson enkawlna hnuaia khel team hian hnehna chang zo lo mah se Asia khawmualpuia team ṭha pawl hi an chhaih mangang hle - China laka an tlawm chuan last 16 luh beiseina a bo theih dawn bawk avangin zaninah thih tha nen an khel dawn. 

South Korea-in champion an tum a, zanin dar 9:30-a an hmachhawn tur hi China chhaih mangangtu Kyrgyzstan an ni - South Korea hi Philippines tum hautak zia hre tawhtu an ni a, Kyrgyzstan hi zuam ngawt bik a fuh dawn lo. 

South Korea ṭantu te tana thu hriat nuam lo tak chu an thiampuipa Son Heung-min an la chhawr thei dawn lo a, Tottenham Hotspur forward tel hi chuan team 'dang' daih an ni - a tel lo erawh chuan chak chiang saa dah bik an harsa.



Share this Post

Login to comment
No Comments