Aizawl FC hmaah Real Kashmir

Vawiin chawhnu dar 2:00 hian Aizawl FC-in Rajiv Gandhi Stadium, Mualpuiah Real Kashmir an mikhual dawn. Mizo club hmachhawn tur Kashmir club hi I League kai thar ni mah se tun season-ah khualmualah chak loh an la nei lo.

Mizo coach hnuaiah

Aizawl FC hian an match hnuhnung berah Indian Arrows an hneh lo a, coach Gift Raikhan chuan banna thehlutin pawm sak a ni. Mizo club hian season liam ta I League best coach Gift thlak nan tawnhriat nei ṭha Standly Rosario Henry an lalut.

I League-a tawnhriat nei ṭha tak Standly hi nimin khan thleng tura beisei ni mah se Bengaluru aṭanga Guwahati panna thlawhtheihna an tih khawtlai avangin Aizawl pan tur thlawhtheihna a nang hman lo a, vawiin hian a rawn thleng dawn chauh.

Hei vang hian vawiin tlaia Aizawl FC leh Real Kashmir inkhel tur hi Jonathan Lalbiakkima leh Rohmingthanga ten an kaihruai dawn. Mizo coach pahnih hian team chhung an hriatchian avangin Kashmir club nena an inkhel tur atan chuan anni aia duhthlan tur an awm chuang lo.

An intawng tawh

Aizawl FC-in December 5 khan Real Kashmir an tlawh tawh a, hemi ṭum hian I League kai thar hian Bazie Armand-a goal hmangin hnehna an chang.

Hemi ṭuma an inkhel chungchang thlirletin Jojo chuan, "Keini aia Real Kashmir ṭhatna chu entu mipui an nei ṭha a, an ram a vawt em em bawk. Chuvangin kan intawn hmasak ṭum khan kan chesual ni loin chak phu zawk an ni a, tun ṭuma kan inkhel turah pawh kan fimkhur phah khawp ang," tiin a sawi.

Goal venhim a pawimawh

Mizo club hian Ansumana Kromah leh Lalkhawpuimawia te chu hliam vangin an chhawr thei dawn lo. Indian Arrows nen Kromah awm loh an tuar tawh a, Mapuia a awm leh tak loh avangin F. Lalremsanga leh Leonce Dodoz ten mawhphurhna an ngah sawt dawn tihna a ni. 

Aizawl FC coach Jojo chuan, "Real Kashmir hi Mohun Bagan hneh zo hlim an ni a, an phur vanglai tak a nih avangin tlarhnung lam kan tichhah deuh ang," tiin a sawi a, counter attack hmanga vuak let an tum thu a sawi tel bawk.

Real Kashmir an inringtawk

Mizo club hian tun season-ah an mual Rajiv Gandhi Stadium chu an hmang thiam hlei thei lo a, season dang zawng aiin club dang pawhin hlauhthawnna an nei tawh lo. Tun season-ah Aizawl FC hian Minerva Punjab, Chennai City leh Indian Arrows te an hneh lo a, Neroca nen inhnehtawkin East Bengal leh Gokulam Kerala te chauh an hneh.

Real Kashmir coach David Robertson chuan, "Point thum hmuh tumin Aizawl hi kan rawn pan a, hnehna chan ngei kan tum. Aizawl FC hi kan dah thiam tihna a ni lo a, team ṭha tak ni mah se champion kan tum a nih chuan chak kan tum a ngai a ni," tiin a sawi.

Aizawl FC mikhual tur Real Kashmir hian khualmualah chak loh an la neih loh avangin inrintawkna nena Mizo club an hmachhawn tur hi a mak lo. Kashmir hian match 11-ah point 21 an hmu a, hmahruaitu Chennai City an phak lohna chu point thum lek a ni.

Ṭanrual a ṭul

Aizawl FC an chak loh chuan state dangin Mizoram football an hmuh dan a dang ve zel dawn a, chuvangin Mizo mipui ṭanrual a ngai.

MPL champion Aizawl FC hian I League an khel a, pahnihna Chhinga Veng pawhin Second Division I League an khel dawn a, RG Stadium bawk home match khelh nan an hmang dawn. India ram puma football kaltlanga Mizo hmel a lan mawi nan football ngainatuten kan Mizo club-te an ṭawiawm ṭhat a ngai a ni.



Share this Post

Login to comment
No Comments