Juventus leh Aaron Ramsey inrem

Aaron Ramsey chuan free transfer-in Juventus a zawm dawn. Arsenal midfielder hian Italian champion tan kum nga daih contact a ziak dawn a, an inremna hlut zawng hi pound maktaduai 36 hu a ni ang.

Wales international midfielder hian Turin-ah hian kar khat chhungin £140,000 a hlawh dawn, Juventus player zingah Cristiano Ronaldo dawta hlawh hnem pahnihna a ni ang. Juve player langsar Paulo Dybala leh Douglas Costa te aiin a hlawh hnem zawk dawn tihna a ni.

Kum 28 mi Ramsey hian tun season tawp thleng daih bak Arsenal tan contract a nei tawh lo, pawt sei tura indawrna a tlawlh avangin January thla aṭang hi chuan Premier League club pawn lam bik club te nen pre-contract agreement an nei thei tawh.

Arsenal player ni lai zinga senior ber Ramsey hian 2008 khan Cardiff aṭangin North London hi a zawm a, league match 252 a khelh aṭangin goal 52 a khung. FA Cup nomawi vawi thum chawipuiin, 2014 leh 2017 final bikah phei chuan chakna goal a khung.

Serie A hmahruaitu Juventus hi an squad a chhuah ṭha sa a, an midfielder thar hian hmun a chang nghal ang em tih chu zawhna lian tak a ni. Juve manager Massimiliano Allegri leh director Fabio Paratici te hi Ramsey duh em em tu an ni a, hei vang hian Miralem Pjanic leh Blaise Matuidi te nen midfield an luah lum tura ngaih a ni. Mahse, Emre Can, Rodrigo Bentancur leh Sami Khedira te an la awm ve bawk avangin hmun inchuh a na dawn hle.

Ramsey chhuak hi Arsenal tan channa lian a tling dawn, a thlakna tur lakluh leh pawh thil awlsam a ni lo ang. Player ṭha a nih bakah free transfer a nih vangin club lian dang pawhin an ngaihven a, Juventus bakah hian Real Madrid, Bayern Munich, Inter Milan leh Paris St-Germain te nen pawh sawizawm a lo ni tawh.



Share this Post

Login to comment
No Comments