Thla tharah Pro Fight

Nikum lama neih tur ruahman, a hun sawn tak Zothan Autoworks LPS Pro Pro Fight chu February 5 aṭangin R. Dengṭhuama Indoor Stadium-ah neih ṭan a ni dawn ta. A vawi khat nan India hmar chhak state dang aṭangin boxer ṭha an rawn tel dawn.

Nikum November 10 aṭanga ṭan turin Pro Fight vawi riatna kalpui a ni tawh a. Mahse, a khelhna hmun turah harsatna a awm. Mizoram Assembly inthlanpui vote chhiar nan R. Dengṭhuama Indoor Stadium hman a nih avangin Pro Fight khelh hun sawn hlat a ni.

Pro Fight organising committee chu Nilaini khan an ṭhukhawm a, February 5-ah R. Dengthuama Indoor Stadium-ah Pro Fight ṭan turin thutlukna a siam a, kum kal taa tel tuma form theh lut tawhten a thara tih ngai lovin an ring nghal thei a, tel duh si entry form la thehlut ve lo tan kar khat chhung hawn a ni ang.

January 14 aṭangin LPS Office, Zarkawt-ah tel tum tan Rs 10-in form a lak theih dawn a, January 19 thlengin theh luh theih a ni ang. January 31, zing dar 7 aṭangin Hawla Indoor Stadium, Republic Vengthlangah tel tum zawng zawngin medical test hmachhawnin an inbuk dawn a. Nikuma form thehlut tawh leh kar leha form thehlut thar zawng zawng kim taka kal tur a ni.

Tun ṭum Pro Fight-ah hian a vawi khat nan hmar chhak state dangte tel tura sawm an ni a, weight hrang pangaah boxer pakhat ṭheuh tel thei tura tih an nih angin Manipur aṭangin boxer panga beisei an ni a, Assam leh Meghalaya pawhin boxer an rawn tir ngei tura ngaih a nih bakah state dang aṭang pawhin tel thei tura beisei an ni.



Share this Post

Login to comment
No Comments