Man City-in Carabao Cup final an lut

Carabao Cup-ah champion lai Manchester City-in Football League One club Burton Albion lakah thapui chhuahin Nilaini zan khan Etihad Stadium-ah 9-0 in an sawp. Second leg minute 90 khelh tur la awm mah se Manchester City-in Wembley Stadium ticket an hum tawh a, chhuhsak theih an ni tawh lo ang.

Goal 9 mawle

Inkhel pakhata team pakhatin goal kua an khung hi a awm zen zen lo a, Man City inkhelah erawh beisei theih reng a ni thung. Pep-a hote hian League Cup semifinal an khelh hma hian FA Cup-ah Championship club Rotherham 7-0 in an hneh a, Krismas vuakveta chesual City hi tunah chuan sakeibaknei ril ṭam ang mai an ni.

Burton nen hian minute ngana lekah City tan Kevin De Bruyne-a'n bul a ṭan a, goal riat dangin a chhunzawm. Brazilian forward Gabriel Jesus-a'n goal li a khung a, Oleksandr Zinchenko, Phil Foden, Kyle Walker leh Riyad Mahrez ten goal khat ṭheuh an khung.

A goal belh dawn

Man City ṭantuten 'double digit' duhin 'goal 10' tiin an au rual a, Burton lam an ṭang kawh ve tlat avangin champion lai hian tum ngial mah se goal hnuhnung ber minute 83 hnuah goal dang a luh belh tawh lo.

City manager Pep Guardiola chuan, "Result lawmawm tak a ni a, final kan lut tawh. Amaherawhchu second leg kan la khel dawn a, kan la thutak ang," tiin a sawi a, goal dang a la luh belh dawn tihna a ni.

A tam narawh e

Etihad Stadium-a chakna hi League Cup semifinal-a inhnehna sang ber a ni a, he inelna hrim hrima inhnehna sang ber chu September 1986 khan Liverpool-in second round first leg-ah Fulham 10-0 in an sawp.

City hian kum 31 hnuah match khatah goal kua an khung tlin lehna a ni a, November 1987 khan second tier league-a an awm laiin Huddersfield Town chu 10-1 in an sawp. Pep Guardiola coaching career bikah chuan Barcelona a enkawl laiin  Copa del Rey-ah December 2011 khan L'Hospitalet chu 9-0 in a lo sawp tawh a ni.

An inthlau lua

Man City starting eleven-ah goalkeeper man tlawm zawk Arijanet Muric leh rawlthar Aleix Garcia te lut mah se outfield player dangah Kyle Walker, Nicolas Otamendi, Oleksandr Zinchenko, Kevin De Bruyne, Ilkay Gundogan, David Silva, Riyad Mahrez, Gabriel Jesus leh Leroy Sane te an la awm miau avangin an man ringawt pawh pound maktaduai 300 a tling thuak.

Burton lamin an club record Liam Boyce luhtir mah se ani man hi maktaduai chanve lek a ni a, an inkarah club 51 zet an awm avangin an inthlau lua a ni. Coach Nigel Clough chuan, "Kan tan chuan kan dam chhunga inkhel pawimawh ber ang hial a ni thei a, chutihrualin mualpho takin kan chhuak thei tih hi kan hre sa a. An ball tlanpui dan te, ball an inpek dan te, Premier League baka Europe-a team ṭha ber zinga mi an nih zia an khelh danah a chiang a, team ṭha tam takin an dan thei loh hi keini club te tan chuan tih ngaihna tak a awm lo a ni," tiin a sawi.



Share this Post

Login to comment
No Comments