Icardi-a'n Juve a hlau lo

Inter Milan president Steven Zhang-a'n an tan Serie A pahnihna nih chu a tawk tur thu a sawi a, hetih lai hian captain Mauro Icardi erawh chuan champion lai Juventus an hlauh bik loh thu a sawi.

Hmahruaitu Juventus leh Inter te hi zanin dar 1:00 hian Turin-ah an inkhel dawn a, an inkara point 11 awm hi a tlem sawt a nih loh chuan a zau phah thei dawn - Inter hian hnehna chan tumin Juve hmachhawn an tum.

Kum 25 mi Icardi chuan, "Juventus nen hian kan inhmachhawn fo tawh a, ka hriat theih chinah chuan tum ṭum hi a pawimawh ber a ni hial ang. Point khat hmuh tumin kan kal dawn lo, chak tumin kan feh chhuak dawn a ni," tiin a sawi.

Argentine forward hian an khingpui hmachhuan Cristiano Ronaldo chungchang sawi zuiin, "Ronaldo hi player ṭha leh danglam bik a ni a, ani kan hmachhawn tur hi a phurawm hle. Mahse, kan huphurh lo, tlarhnungah Stefan de Vrij leh Milan Skriniar te kan nei a ni," a ti.

Serie A season kal laiah Ronaldo-a'n goal 10 a khung tawh a, Inter Milan captain Icardi hian goal riat a khung tawh. Inelna hrang hrang nena belhkhawm erawh chuan player pahnih hian goal 11 ve ve an khung tawh a ni.

Inter Milan tan Turin hi inkhelh nawmna hmun a ni dawn lo, November 2012 hnu lamah Juventus khelmualah hian hnehna an la chang leh miah lo, hei vang hian an khelh ṭhat lai tak ni mah se point hmuh ringawt pawh thil awlsam a ni dawn lo.



Share this Post

Login to comment
No Comments