MSL Final-ah Point 600 chuang nei pahnih

Mizoram Super League hmawr bawk a hnai a, game 1 khelh hmain ni thum chiah hun a awm ta. Nomawi inchuh tur Zarkawt BCA leh Tuikual South te hian tun season chhungin match sarih an khelh aṭangin point 600 chuang ve ve an nei thei a, final-ah pawh basket kan hmuh hnem a beiseiawm.

A vawi khat nana champion tum Tuikual South hian point 606 an nei a, champion lai BCA (603 points) aiin an nei hnem zawk. Point 615 ngawt neitu Khatla TBL-in final an lut zo lo, MSL vawi hnih champion tawh hian TKS leh BC Bethlehem lakah point 102 leh 103 an neih avangin an record hi a san phah.

Semifinal chinah chuan Zarkawt BCA hi point nei hnem ber niin point 184 an nei, hma an sawn chhan hi league round lama an chhawr hman loh Cameron Anderson an neih belh tak vang a ni. American player hi vawi hnih a inkhelh tawhah Player of the Night atan thlan a ni ve ve.

Phengphehlep lamin league round lamah BCA aiin point hnem mah se knockout round-ah an tluk lo thung, chutih rualin an khingpui kha Khatla TBL an ni tih erawh kan hriat tel a pawimawh ang. Tualchhung basketball team ṭha paruk inel zinga a ṭha pahnih inkhel tur hi engti kawng zawng pawhin a hmuhnawm tura ngaih a ni.

MSL-5 final game 1 hi December 10, Thawhṭan zan dar 8:00-ah khelh a ni anga, Ningani zanah game 2 khelh chhunzawm tur a ni ang.



Share this Post

Login to comment
No Comments