Man United leh Arsenal ten point insem

Old Trafford chhunga inkhel entu 74,507 zet pungkhawm te ṭan lam a inang lo a, an duh zat point an hmu lo ve ve. Chutihrualin Premier League season kal laia inkhel hmuhnawm leh boruak sang bera chhal ngam hun an tawng.

Nilaini zan inkhelah Manchester United chuan an mikhual Arsenal lakah ṭum hnih si an phurh hnuin an sut zo a, 2-2 in an inhnehtawk. Kum 2006 hnuah Gunners hian Man United khelmualah chakni hmel an la hmu thei lo a, chutihrualin inelna hrang hrangah a zawnin match 20 chhung hneh loh an tawng lo. Beisei phak lo Jose Mourinho naute tan point khat hmuh theih hi result ṭhaa chhiar theih a ni.

Inhnehtawk

Goalkeeper David de Gea chuan harsa lutuk loa dan theih tura ngaih Shkodran Mustafi ball tauh a nam chhuak zo lo a, midfielder Ander Herrera-a'n rawn pet chhuah tum mah se line a pelh hman avangin minute 26 lekah United lamin si an phur.

Goal hmasa ber luh danah referee Andre Marriner-a'n goal-line technology puihna a mamawh a, mit a hmuh hman loh khawpa rang leh zimah khawl hmangin thutlukna dik a siam theih phah.

Man United lamin chawlhlawk hmain Anthony Martial hmangin an siphurh an sut, free kick aṭanga ball rawn kal chu Arsenal keeper Bernd Leno-a'n a chinfel tawk loh vanga thil thlengah a ngaih theih.

Rojo-a'n freekick a chhuih khan Herrera chu a offside ngei niin a lang, mahse assistant referee-in a hmu lo. EPL-ah hian video assistant referee (VAR) hman ni tawh ta se chuan inkhel boruak a danglam phah mai thei.

Substitute Alexandre Lacazette hnathawh ṭhat vangin mikhual bawkin minute 68-naah hma an hruai leh, mahse an lawm chhung a rei lo. Goal a luh aṭanga second 74 a liam hman chauh tihin ven loha awm Jesse Lingard chuan an si phurh a sut zui nghal bawk.

Tihsual vang

Manchester United manager Mourinho chuan an chak loh chhan chu tihsual an neih vang a nih thu a sawi. Portuguese manager chuan, "Tihsual kan tuar, chutihrualin ka naute khan theihtawp chhuahin an bei let a ni," a ti, an match hmasa zawka a naute sawiseltu chuan a fak let thei thung ta.

Goal an chhuah pahnih thlir chuan Mourinho thusawi hi a pawmawm hle. Keeper De Gea-a'n nidanga a tih sual ngai loh tak a tisual a, an goal hnihna an chhuah chhan pawh Marcos Rojo-a'n a hlauhawm chinah ho lam taka ball a hloh vang a ni. Argentine defender hian a tihsual hliah khuh tumin theihtawp chhuah mah se anmahni lamah a ti lut.

Bench aṭangin Paul Pogba, Romelu Lukaku leh Marouane Fellaini te an luh hnuah United lamin tharum an hmang nasa a, ball kang petin vanneihna an zawng. Mahse, point hmuh theih hnuhnung 12 zinga point thum chauh hlawh chhuak thei United vanneih ni a her chhuak lo. A tir lama chesual De Gea pawh Pierre-Emerick Aubameyang goal khung tur ṭum hnih a dan chu keeper naran tih theih a ni lo.

A pawi ta!

An chet fuh theih lohna mualah Arsenal lamin ṭum hnih hma an hruai thei a, a hmawr erawh an bawk ṭha tawk lo. Chawlhlawk hmain defender rinrawl Rob Holding chu hliam vanga lakchhuah a ngai a, hrem vanga inlan lo Granit Xhaka aiawhtu Aaron Ramsey pawh hliam vang bawkin thlak a ngai.

Arsenal manager Unai Emery chuan, "Doctor chuan Holding hliam hi a nat hmel hle tiin a sawi a, endik a nih hma chuan a chawlh chen tur a la chiang lo," a ti. English defender hi Spanish manager hnuaiah a khel ṭha ṭhin hle a, captain Laurent Koscielny inkhelh theih hun an nghakhlel zual ngei ang - France international hlui hi Under 23 team tan chuan a inlan thei tawh.

Inkhel chungchang sawi zawmin Emery chuan, "Ka hmuh dan chuan inkhel kan thunun a, hun chanve hmalam ai chuan a hnu lam kha kan khel ṭha zawk. Chak thei turin hun ṭha kan nei a, goal kan khung hnu lawka kan chhuah leh ṭhin kha a pawi.

"Kan tlarhnung lam thuam chak a ngai, chutihrualin tlarhma pawh kan nep tur tihna a ni chuang lo, team inbuktawk tak tak din a ṭul a ni. 2-2 a nih hnuah pawh hnehna chang thei turin hun ṭha kan la insiam thei, chak tum mah ila kan point hmuh zatah lawm a ṭul. Kan khelh danah ka lawm hle," a ti. 

Arsenal hian tun season chhungin hun chanve hma lama hma hruai an la nei lo, hetihrual hian hma an hruai zet tawh hnua an chak zawh lohna hmasa ber a ni thung. Emery naute hian point 31 hmuin pangana an ni a, United erawh point 23 nen pariatna an ni mek.

Goal li kan khung - Mourinho

Pa ṭawng duh ve tak Jose Mourinho chuan Arsenal nen an inhnehtawk zana goal lut chu anmahni lam khung vek niin a sawi. Mourinho chuan, "Goal li kan khung a, a tawpah 2-2 in kan inhnehtawk. Tihsual kan nei reng a, kan tihsual chu kan tuar a ni.

"Nidang ang bawkin kan famkim lo, chutihrualin kan ruilru puthmang erawh a dik tawh. Player ṭhenkhat an chauh laiin a ṭhen erawh season tluanin an inlan tam lo thung, Chris Smalling khan dinhmun harsa tak chungin match a khelh a ngai," tiin a sawi.

A naute a fak viau rualin a duhkhawp loh thu sawi zuiin Mourinho chuan, "Mi ṭhenkhat chuan Roy Keane, Ruud van Nistelrooy leh Nemanja Vidic te awmna team nen min khaikhin ṭhin, kei chuan ka pawm ve lo. Hahdam kan mamawh a, kan rilru a dik tawk rualin ngelnghet taka khelh ṭhat chu kan la harsat a ni," a ti.



Share this Post

Login to comment
No Comments