Chelsea tawlhthluk zanah Liverpool an buai ve lo

Nilaini zan Premier League inkhelah champion tum Chelsea chu Wolverhampton Wanderers lakah 1-2 in an tlawm a, Liverpool erawh goal an chhuah hmasak zet hnuah Burnley lakah 3-1 in an chak a, Manchester City an um zel. 

Premier League-ah match 15 khelh a nih hnuin City leh Liverpool an la tlawm ve lo. Vawi hnih chiah draw result la nei City chu a chung berah an awm a, vawi thum an khingpui inhnehtawkpui tawhtu Liverpool-in an dawt. 

City leh Liverpool te nen 'huang' khata awm reng Chelsea erawh Wolves an hneh loh chiah hian an league match hnuhnung paliah vawi khat chiah an chak avangin palina lamah an tla thla a, point 10 zeta City an thlauh tawh avangin champion 'in um' zinga chhiar tel an harsa rih. 

Hetihlai hian Tottenham Hotspur chuan ngaihthah chi an ni bik lo tih pholangin an mikhual Southampton chu 3-1 in an hneh ve bawk a, Chelsea zuan khumin pathumnaah an awm. 

Beisei phak lo

Liverpool boss Jurgen Klopp-a'n Merseyside derby an khelh chauh avangin fimkhur takin player a thlang a, Everton an hneh ṭuma starting XI aṭangin player pali chiahin inkhel bul an ṭan nawn. 

Reds tlarhma chhuanvawr Mohamed Salah, Roberto Firmino leh Sadio Mane te zingah inkhel bul ṭan an awm lo a, May 2017-a West Ham an hmachhawn hnua player pathum zinga pakhat talin Liverpool tan Premier League-a inkhel bul an ṭan loh hmasak ber a ni. 

Minute 23-na lekah Liverpool-in defender Joe Gomez chu hliam vangin an chan zui a, an tlarhma chhuanvawr pathum tel loin an hriam tawk lo bawk - goal chance erawh nei lo tawp an ni lo a, Daniel Sturridge leh Naby Keita te hun neih ṭhat chu Joe Hart chuan ṭha zetin a dan sak. 

Goal khung loin chawlhlawk an hmang a, City chak hre sa chunga inkhel Liverpool fan-te lungmuangin an awm lo. 

Beisei loh lam...

Second half-ah Liverpool goal nawr chu na sawt tura beisei a ni a, beisei ang erawhin thil a kal lo - minute 54-na lekah Jack Cork chuan Alisson ball man ngheh loh zarzoin hmahruaina goal a khung a, Reds an hawihai. 

Liverpool-in si erawh an phur rei lo. Minute riat a liam hman chauh tihah James Milner chuan goal kil sir zetah pet lutin si phurh sutna goal a khung a, Reds an nung thar. 

Jurgen Klopp-a'n substitution awmze nei a siamzui a, point thumah lo chuan lungawi a tum lo tih lantirin Firmino leh Salah a luhtir. Substitution siam aṭanga minute thum hnu lawkah Klopp-a thutluknain awmzia a nei nghal a, Virgil van Dijk-a siamsak chu Firmino chuan awlsam takin goal-ah a khung.

Alisson-a'n Ben Mee khung tur nia lang ṭha zeta a dan hnuah Xherdan Shaqiri chuan Liverpool chak nemnghehna a khung zui a, Burnley khelmualah 3-1 a chakin Liverpool-in City an um zel.

Liverpool an ṭha!

Season ṭan hmain Premier League hrechiangtu leh english footballl-a mi langsar ten Manchester City leh Liverpool chu champion tura inum ber tur nia an ngaih thu an sawi a, an thusawi dikna hmuh turin a awm zel. 

Reds tan ṭum dang ang thoin Van Dijk a khel ṭha a, Alisson awm hnua an phui sawtzia lah hmuh hmaih theih a ni lo - Brazilian keeper hi a league match hmasa 15-ah a tlawm ta lo a, Javier Mascherano-a'n 2007-a record a lo siam tawh chu a nihrual.

Liverpool boss Klopp chuan, "Second half-ah kan insiamṭha leh thei a, point thum kan hlawhchhuah avangin ka lawm takzet a ni," a ti. 

Mangṭha Chelsea?

City leh Reds fan-ten 'title race' aṭangin Chelsea an mangṭha a nih pawhin a mak lo ang. Blues hian minute 18-na lekah Ruben Loftus-Cheek ball pet Wolves captain Conor Coady-a'n an lama a tih luh avangin hma hruai mah se lawm avangin an au nawn tawh lo. 

Raul Jimenez leh Diogo Jota ten second half-ah Wolves tan goal an rawn khung a, 2-1 in an chak. Chelsea manager Maurizio Sarri chuan, "First half-ah kan khel ṭha takzet a, game thih tir theihna hun pawh kan nei. Mahse, goal kan chhuah thut a, kan buai ta vek a ni," tiin inkhel a thlirlet.

Chelsea hian inkhelh chhung zawngin 70% ball an chang a, vawi 17 zet shot an nei bawk - hei mai a ni lo, Alvaro Morata penalty hlawhchhuah ngei nia lang chu referee-in a pe lo a, chak loh chhuanlam tur an nei. 

Hei le Spurs

Champion tura rinkai ni si lo, big team zinga chhiar tel loh theih loh ni bawk si chu Tottenham an ni. London club hian Harry Kane, Lucas Moura leh Son Heung-min hmangin goal an khung a, hun pek belhah Charlie Austin hmangin Saints hian goal khat an khung ve bawk. 

Spurs-in hnehna an chan avangin table chung lam an hnaih zel a, Saints erawh relegation zone an la chhuahsan thei lo - Southampton hian coach Mark Hughes an ban hnuah Ralph Hasenhuttl an lalut a, Austrian coach hian mipui zing aṭangin a team thar inkhel hi a en. 

Tottenham manager Mauricio Pochettino chuan, "Kan keeper Hugo Lloris kha man of the match a ni a, mahse chu chuan minti lawm lo a ni. Arsenal nena kan inkhel aiin goal khungna hun kan pe hnem zawk. Mahse, point thum kan hmuh avangin kan hna erawh kan hlenah ka ngai," tiin a sawi.



Share this Post

Login to comment
No Comments