Russia an hrem chhunzawm

International Association of Athletics Federations chuan Russia laka hremna an lekkawh lai chu nakkumah pawh an chhunzawm dawn. Hrem chhunzawm tur an nih hi Russian athlete tan chuan anchhia ang maia dawn nuam lo a ni ngei ang.

Russian athlete-te hian 2014 Winter Games an thlen ṭum khan an ram sorkar hriatpuina hnuaiah dan an bawhchhia a, he thil hi hriat chhuah a nih hnuah an chungah hremna lekkhawh a ni. Hei vang hian ram leh ram inelna ho reng rengah chuan an ram aiawhin an inlan thei lo.

Rio Summer Olympic leh South Korea-a Winter Olympic-ah te khan neutral athlete ni chungin an lo inlan tawh a, an dan bawhchhiat chhui chian nana sum leh pai senso zawng zawng pawh IAAF chuan chawi turin a ti bawk.

IAAF hnuaia Russia chungchang ngaihtuahtu pawl hotupa Rune Andersen chuan, "Russia hian vawi kua ngawt hrem an nihna hlip turin an ngen tawh a, hnawl a la ni vek. Kumin kum tawpah an ti leh dawn a nih chuan data mumal tak hmangin an ti turah kan ngai," tiin a sawi.

Hetihlai hian Russian lam erawh an lungawi thei bik lo, Russia Athletic Federation president Dmitry Shlyakhtin chuan engtikah emaw chuan an dikna chanvo an la hai lan ve ngei a beisei thu a sawi ve thung.



Share this Post

Login to comment
No Comments