Perez faktu Pellegrini

West Ham manager Manuel Pellegrini chuan Cardiff City laka goal hnih khungtu Lucas Perez chu player ṭha tak a nih thu a sawi a, a goal khung chuan inrintawkna a pek belh ngei a beisei thu a sawi.

Thawhlehni zan Premier League inkhelah Hammers hian an mikhual Cardiff chu 3-1 in an hneh a, an goal hmasa pahnih hi bench aṭanga lut striker Perez khung a ni - Pellegrini naute hian hun tawp dawnah goal khat chhuah ve mah se point thum an hmu tho.

Arsenal aṭanga West Ham zawmtu Perez hian August thla hnu lamah minute 27 chhung bak league match a la khel lo, manager nen boruak duhawm lo an neih tawh bawk avangin London Stadium-ah hian a dinhmun a nghet vak lo nia sawi pawh a awm.

Mahse, Pellegrini-a'n a chungah rinna a nghat ngam, hliam vanga Marko Arnautovic lakchhuah a nih hnuah Perez dah luh a ni a, Spanish striker hian a pu beiseina a ti thlawm lo; 2017 January thla hnua a vawi khat nan EPL-ah goal a khung ve leh ta a ni.

Hammers manager Pellegrini chuan, "Ani hian a theihna fiah leh chuan a mamawh lo, hetiang hi a ti thei tih kan hriat vang a lei kan ni zawk. Lucas khan a khel ṭha hle, vawi khatah player neih zawng zawng hman theih a ni lo a, an khelh loh chhan a awm ṭhin, hun an neih ang zela an khel ṭha hian min ti lawm," a ti.

West Ham tan hian Arsenal player hlui tho Lukasz Fabianski chu point an hmuh theih nana mi pawimawh a ni bawk. Poland international hian chawlhlawk hma a Joe Ralls-a penalty pet chu dan sakin an goal a venghim.

Point thum an hmuh avangin Pellegrini naute hian hmalam an pan zel, season tir lamah talbuai deuh mah se 12-na an ni leh tawh. Neil Warnock enkawl Cardiff erawhin khualmualah match sarih an khelh aṭangin point khat chiah an hlawh thei a, 16-na niin an dinhmun a la him lo hle.



Share this Post

Login to comment
No Comments