Blasters leh Jamshedpur inhnehtawk

Indian Super League-ah Thawhlehni zan khan Kerala Blasters chuan Jamshedpur FC an mikhual a, team pahnih hi goal khat ve ve khungin an inhnehtawk. 

Jamshedpur tan Carlos Calvo chuan minute 66-naah penalty aṭangin goal hmahruai a khung a, mahse Blasters hian minute 77-naah Seiminlen Doungel hmanga chhangletin an inhnehtawk ta a ni. 

Mizo tlangval Jerry Mawihmingthanga chu Emerging Player of the Match atan thlan a ni a, minute 12-naa hliam vanga lakchhuah Michael Soosairaj thlak tura luhtir  Chanmari tlangval hi a hmuhnawm hle. 

Jerry hian Tim Cahill tan vawi khat ṭha zetin a siam sak a, Australian legend-in a siamsak let chu uiawm takin goal-ah a chantir thei lo bawk.

Khelh tam a duh avanga ATK aṭanga Jamshedpur pantu Malsawmzuala'n a beisei ang ngeiin khelmual chhungah hun ṭha a nei nghal a, Blasters lakah hian inkhel bul ṭantir a ni. 

Zanin dar 7:30-ah Indian Super League inkhel pakhat a awm dawn a, Mumbai City chuan beisei phak lo champion lai Chennaiyin FC an mikhual ang. 



Share this Post

Login to comment
No Comments